AN BATAN-ON nga nakikita mo dinhi nga kaupod ni apostol Pablo amo hi Timoteo. Naukoy hiya ha Listra upod han iya pamilya. An iya nanay amo hi Eunice ngan an iya lola amo hi Loida.

Ini an ikatulo ka beses nga pagbisita ni Pablo ha Listra. Mga usa ka tuig na an naglabay, siyahan nga kinanhi hira Pablo ngan Bernabe basi magsangyaw. Ngan hini nga panahon binalik utro hi Pablo upod an iya sangkay nga hi Silas.

Ano an ginsisiring ni Pablo kan Timoteo? Nagpapakiana hiya: ‘Karuyag mo ba umupod ha amon ni Silas? Mabubuligan mo kami ha pagsangyaw ha mga tawo ha higrayo nga lugar.’

‘Oo, karuyag ko umupod,’ binaton hi Timoteo. Salit waray pag-iha, ginbayaan ni Timoteo an iya pamilya ngan inupod kanda Pablo ngan Silas. Kondi antes naton hibaroan an ira byahe, aton anay kitaon kon ano an nahitabo kan Pablo. Mga 17 ka tuig na tikang nga nagpakita hi Jesus ha iya ha dalan tipakadto ha Damasko.

Hinumdumi nga kinadto hi Pablo ha Damasko basi pagtimarauton an mga disipulo ni Jesus, kondi yana usa na hiya nga disipulo! Ha urhi, may-ada mga kaaway nga nagplano ha pagpatay kan Pablo tungod kay nadiri hira nga nagtututdo hiya mahitungod kan Jesus. Kondi ginbuligan hiya han mga disipulo nga makapalagiw. Ira iginbutang hiya ha alat ngan igintunton ha gawas han pader han syudad.

Katapos, kinadto hi Pablo ha Antiokia basi magsangyaw. Didto siyahan nga gintawag nga Kristiano an mga sumurunod ni Jesus. Katapos, ginsugo hira Pablo ngan Bernabe ngadto ha higrayo nga nasud basi magsangyaw. Usa han mga syudad nga ira ginbisita amo an Listra, an lugar ni Timoteo.

Paglabay hin mga usa ka tuig, binalik hi Pablo ha Listra ha iya ikaduha nga byahe. Han inupod hi Timoteo kanda Pablo ngan Silas, maaram ka ba kon diin hira kumadto? Kitaa an mapa, ngan aton usisahon an iba nga lugar.

Siyahan, kinadto hira ha kahirani nga Ikonio, sunod, ha usa pa nga syudad nga Antiokia liwat an ngaran. Katapos hito, nagbyahe hira ngadto ha Troas, sunod ngadto ha Filipos, ha Tesalonika ngan ha Berea. Nakikita mo ba an Atenas ha mapa? Nagsangyaw didto hi Pablo. Katapos, mga usa ngan tunga ka tuig nga nagsangyaw hira ha Korinto. Kahuman hito, ginbisita nira an Efeso. Katapos, binalik hira ha Cesarea sakay ha barko, ngan nagbyahe ngadto ha Antiokia, diin nagpabilin hi Pablo.

Salit ginatos ka kilometro an ginbyahe ni Timoteo ha pagbulig kan Pablo ha pagsangyaw han “maopay nga sumat” ngan pag-organisa hin damu nga Kristiano nga kongregasyon. Pagdaku mo, magigin matinumanon ka ba nga surugoon han Dios pariho kan Timoteo?