MCANDA jwakum’wona apanoju, jwali ni ndumetume Pauloju, ali Timoteyo. Timoteyo ŵatamaga ni ŵa mwiŵasa mwakwe ku Lusitala. Mama ŵakwe lina lyawo lyaliji Yunisi, soni anganga ŵakwe ŵakongwe lina lyawo lyaliji Loisi.

Keleka kali katatu Paulo ali mkuyika ku Lusitala. Ciŵandika caka kapena kupunda pelepo, Paulo ni Banaba ŵayice akuno kandanda paulendo wawo wakulalicila. Sambano jino Paulo awujilesoni ali ni mjakwe Sila.

Ana akumanyilila yakuŵeceta Paulo kwa Timoteyo? Akuŵeceta kuti: ‘Ana mkusaka kuti tuŵe yimpepe ni une, nambosoni Sila? Mpaka mtukamucisye kwalalicila ŵandu ŵakutama ku malo kwakutalicila.’

Timoteyo akwanga kuti: ‘Elo, kwende tuŵe yimpepe.’ M’yoyo mwangakaŵilisya Timoteyo akwaleka ŵa mwiŵasa mwakwe nikwendaga yimpepe ni Paulo, soni Sila. Nambo mkanitulijiganye ya ulendo wawo, kwende tulole yayikumtendecela Paulo. Papite yaka ciŵandika 17 kutyocela pandaŵi jele Yesu ŵawonecele kwa jwalakwe pamsewu wakwawula ku Damasiko.

Akumbucile kuti Paulo ŵapite ku Damasiko kukwasawusya ŵakumkuya Yesu, nambo jwalakwe ali sambano jwakumkuya Yesu! Kaneko acimmagongo ŵane akulinganya yakum’wulaga Paulo, ligongo ngayikwanonyela yakwiganya pakwamba ya Yesu. Nambo ŵakumkuya Yesu ŵane akumkamucisya Paulo kuti akulupuce. Akum’ŵika m’citundu nikumkopocesya kusa kwa lutenje lwa msinda.

Kaneko Paulo akwawula kukulalicila ku Antiokeya. Kuli akuno kwele ŵakumkuya Yesu akukolanjikwa kuŵa Aklistu. Paulo ni Banaba kaneko akwasalila kuti atyoce ku Antiokeya nikwatumisya kukulalicila ku yilambo yakutalicila. Wine mwa msinda wakulalicila wuli wa Lusitala, kumangwawo Timoteyo.

Sambano, pali papite ciŵandika caka cimo, Paulo akwawulasoni ku Lusitala paulendo wakwe waŵili. Timoteyo pakutyoka yimpepe ni Sila, ana akumanyilila kwakwawula? Kwende tulole mapuga kuti tugamanye gane mwa malo gaŵapite.

Candanda akwawula pakuŵandika, ku Ikoniya, kaneko akwawula kumsinda waŵili wakolanjikwa Antiokeya. Kaneko akwenda mpaka kuja kwika ku Tulowa, kaneko akwawula ku Filipi, Tesalonika, soni Beleya. Ana akukuwona ku Atene pa mapupo? Paulo akulalicila kweleko. Kaneko akumala caka ni hafu ali mkulalicila ku Kolinto. Kumbesi kwakwe akwima panandi ku Efeso. Kaneko akuwujilasoni munyuma pa liboti kwawula ku Kaisaleya, soni akwawula ku Antiokeya, kwakusatama Paulo.

M’yoyo Timoteyo akwenda mahandiledi ga mamailosi pakumkamucisya Paulo kulalicila “ngani syambone,” soni kutandisya mipingo jejinji ja Ciklistu. Ana wawojo pacacikulapo, caciŵa jwakutumicila Mlungu jwakulupicika mpela Timoteyo?