MBIOXHLAS ni rabilo sagané Pablo, laabu Timoteo. Láabu rabésbu né xfamilybu lainy gudx Listra. Xinaʼbu laa Eunice né soiscólbu laa Loida.

Ndeʼ ma rion buelt ni Pablo rieed Listra. Ma godudy toib íz de goló Pablo né Bernabé goyoʼyibu né goníyibu xtiitz Dios lagary reʼ primerdiguieʼ. Nigoreʼ Pablo ma bibiguetbu né ximigbu Silas.

¿Nanlo xí ranabdiitz Pablo a Timoteo la? Pablo ranabdiitz láabu: ¿Rioladxloʼ gony compañerlo naʼ né Silas la? Looy labúu gacnélo lóodo guisuidyno xtiitz Dios buñ ni rabés lainy gudx ni rian sit de lagary reʼ.

Timoteo racapy: Rioladxi tzaaya né lóoto. Por ngú, diti xidzú Timoteo rasian xfamily né rony compañerbu Pablo né Silas. Per nír ganno xi gosaclóo Pablo, ór cú guisuidyno pu guirá lagary goyebu né Timoteo. Ma godudy diecisiete íz de goló Jesús bireʼ lóo Pablo ló néz ni sée niis Damasco.

¡Bisednaladx, Pablo bieedbu Damasco par gonybu mal guirá ni racanal Jesús, per nigoreʼ láabu ma nacbu xpiin Jesús! Diti xidzú, tipnés xi enemigbu rayopyibu mod guigaityibu Pablo, per buñ ni racanal a Jesús racné par labúu guilaabu. Lainy toib dzoim ralityibu Pablo ló muro ni nap gudxcú né rareʼbu fuer, modreʼ ralaabu.

Ór cú Pablo radudy niis Antioquía par guinibu xtiitz Dios. Lagary reʼ ro primer rareʼ laa ni racanal a Jesús cristianos. Pablo né Bernabé noyibu Antioquía ór cú noʼ ni raxel layibu tzeyibu niis tipnés gudx ni noʼ sit. Toibtica gudx ro rieyibu laa Listra, lagary ro rabés Timoteo.

Ma yaaca godudy toib íz, Pablo rabiguet Listra stoib ndeʼ ma nacní rarop buelt ni rieedbu lagary reʼ. Órni Timoteo rasaló rony compañerbu Pablo né Silas, ¿nanlo pu lagary rieyibu la? Bibiʼ dibuj ro sieed xidal gudx, né ganno pu lagary goyeyibu.

Primer rieyibu Iconio toib gudx ni rian gahx Listra, gudx ni rarop rieyibu laa Antioquía. Lagary reʼ rareʼyibu rieyibu Troas, láaca rieyibu Filipos, Tesalónica né Berea. ¿Rienlólo pu lagary rian Atenas la? Pablo láaca raniʼ xtiitz Dios lagary reʼ. Láaca por toib íz gorol raniyibu xtiitz Dios lainy gudx ni laa Corinto. Radxiin midid rioʼyibu Éfeso por tidxósi dzú. Né rabiguetyibu lainy bark gudx Cesarea, né riaʼpyibu niis Antioquía, lagary reʼ rian Pablo.

Xomod ma bisuidyno, Timoteo gosaabu sit par gocnébu Pablo goníyibu «diitz sacró» xtuny Dios ro gocnébu goyaʼ xidal congregación. Órni looy niʼslo, ¿gonylo xchiin Dios xomod Timoteo la?