IYEE! Cinshi cilecitika apa? Bushe umwaice uuleele pa nshi naicena sana? Bushe nawishiba ukuti umo pa baume abalefuma mu ng’anda ni Paulo? Inga Timote naumumona? Bushe uyu umwaice, aponene ukufuma pa windo?

Ee. Paulo alelanda ilyashi ku basambi mu Troa. Alishibe ukuti pali no kupita inshita iitali pa kuti akabamonepo na kabili pantu ubushiku bwakonkelepo aali no kuya no bwato. E ico alitwalilile ukulanda mpaka pa kati ka bushiku.

Uyu umwaice Yutuki, aikele pa windo e lyo apona mu tulo. Aponene ukufuma pe windo ilyali pa ntunti ya butatu! E co abantu basakamaniine. Abaume basangile uyu umwaice ninshi nafwa, nga filya fine baletontonkanya!

Ilyo Paulo amwene ukuti umwaice nafwa, aleele pali ena no kumufukatila. Lyena alandile ati: ‘Mwisakamana. Alifye bwino!’ Na cine ali fye bwino. Ici cali cipesha amano! Paulo alibuushishe uyu umwaice ku bafwa! Abantu balitemenwe sana.

Balibwelele mu muputule wa pa muulu no kuyalya ifya kulya. Paulo atwalilile ukulanda mpaka bwaya buleca. Yutuki tabwekeshepo ukulaala! Lyena Paulo na Timote e lyo na balya baali nabo baninine ubwato. Bushe walishiba uko baile?

Paulo e lyo alepwisha fye ulwendo lwalenga butatu ulwa kushimikila, kabili alebwelelamo ku mwabo. Pali ulu ulwendo, mu Efese fye, Paulo aikelemo imyaka itatu. E ico ulu ulwendo lwali ulutali ukucila ulwendo lwa bubili.

Ilyo bafumine ku Troa, ubwato bwaliminine pa Milete pa nshita iinono. Apo umusumba wa Efese wali mupepi na Milete, Paulo aitile abakalamba ba mu cilonganino aba ku Efese pa kuti bamonane nankwe mu Milete no kulanshanya nabo pa muku wa kulekelesha. Abakalamba ba mu cilonganino balyumfwile ububi sana ilyo inshita yafikile iya kuti Paulo aleya no bwato!

Mu kulekelesha, ubwato bwalibwelelemo ku Kaisarea. Ilyo Paulo aleikala pa ng’anda ya kwa Filipi, kasesema Agabu aebele Paulo ati bakamukaka mu cifungo nga aya ku Yerusalemu. Ifyo alandile fyalicitike. Pa numa ya kuba mu cifungo pa myaka ibili mu Kaisarea, Paulo bamutumine ku Roma ku kulubulula kuli Kaisare, kateka wa bena Roma. Leka tumone ifyacitike ilyo aleya ku Roma.