Maana 111nan

Kamalennin min sunɔgɔra

OH! OH! Mun kɛra yan yɔrɔ la? Kamalennin min dalen bɛ dugu ma, a joginna kosɛbɛ wa? Cɛ minnu bɔra kɛnɛma, olu lajɛ. Kelen ye Paul ye. I ɲɛ bɛ Timote fana na wa? Yali kamalennin ma bɔ fenɛtiri de fɛ ka bin dugu ma?

Ɔwɔ, o de kɛra. Paul tun bɛ ka kuma kalandenw fɛ yan, Troas. A tun b’a dɔn ko waati jan kɔnɔ, a tɛna u ye bawo a ka kan ka taa kurun fɛ o dugujɛ. O la sa, a tora kuma na fo ka miniwi se.

O Kamalennin tɔgɔ tun ye ko Utikus. A tun sigilen bɛ sankanso fenɛtiri kan, a sunɔgɔra yen. A bɔra sankanso sabanan fɛnɛtiri de la ka bin dugu ma. O de y’a to mɔgɔw jɔrɔlen bɛ. Mɔgɔw y’a ta tuma min na, u tun bɛ siran min ɲɛ, o de kɛra. Kamalennin sara.

Paul y’a ye minkɛ ko kamalennin sara, a y’i da a kan, k’a bolo kɛ k’a dɛrɛ a disi la kosɛbɛ. A tilala k’a fɔ ko: ‘Aw dusu kana kasi. Tɔɔrɔ si tɛ a la.’ A ɲɛnama don. O ye kabako ye. Paul ye Utikus lana ɲɛnamaya la. Nisɔndiya sinna ka bonya jama bɛɛ la .

U bɛɛ yɛlɛnna san fɛ kokura ka tila ka dumuni kɛ. Paul tora kuma na fo ka dugujɛ. Nka i bɛ se ka da a la ko Utikus ma sunɔgɔ tun o kɔfɛ. O kɔfɛ Paul, Timote, ani u taamaɲɔgɔnw donna kurun kɔnɔ ka taa. I b’a dɔn u taara yɔrɔ min na wa?

Paul tilatɔ filɛ a ka taama sabanan na waajuli kama. A bɛ sira kan ka segin a ka so. O taama kɔnɔna na, Paul kelen ye san saba kɛ Efese dugu kɔnɔ. Nin taama janyara ka tɛmɛ a ka taama filanan kan.

Kurun bɔlen kɔ Troas, a ye waati dɔ kɛ Mile. Ikomi Efese ni o yɔrɔ tun man jan ɲɔgɔn na, Paul ye ci bila jɛkulu maakɔrɔw ma, u ka a sɔrɔ Mile walisa a ka se ka kuma u fɛ siɲɛ laban na. Kurun taatuma selen, u ɲɛsisira ikomi u y’a ye ko Paul tun bɛna taa.

 Kurun labanna ka segin Sesare. Ka Paul to o yɔrɔ la, kalanden Filipe ka so, kira Agabus y’a fɔ a ye ko ni a sera Jerusalɛm tuma min na, ko u bɛna a minɛ k’a bila kaso la. O dun de kɛra. Paul kɛlen kɔ ka san fila kɛ kaso la Sesare, Paul bilala ka taa Romɛ walisa u ka taa a kiri tigɛ Sesar ɲɛkɔrɔ, n’o ye Romɛ kuntigiba ye. An k’a lajɛ fɛn min kɛra Romɛ sira kan.

Kɛwalew tilayɔrɔba 19 ka na 26 la.