MAAA! Tala kama aha! Yika yinapu ho? Shina mukweze au unapombo hashi kalemana chinji nyi? Tala nawa! Umwe wa kuli malunga waze anatuhuka fuji mu zuwo kali Paulu! Yena muhasa kumona nawa Timoteu? Shina mukweze wacho kaholoka ha kapenda?

Mba, chino che chapwa ko. Paulu te kanalumbununa chimwe chiyulo kuli tumbaji mu Troa. Iye te kananyingika ngwo ha mashimbu anji ayo kechi kumumona nawa, mumu iye te makwata ulungu ha tangwa lize te mulisuloho. Kashika iye yanunga ni chiyulo ndo ha muchima ufuku.

Mukweze wacho jina lienyi Utecho te kanatwama ha kapenda, hohene iye yaya mutulo. Iye yaholoka unyimenyime haze lia kapenda, chize ku chipatulo chamuchitatu ndo hashi! Kashika yena muhasa kumona mumu liaka atu ali ni yipikalo. Muze malunga jacho yakwata mukweze, ayo te kali ni woma. Ngwo iye kafwa!

Muze Paulu hamona ngwo mukweze te hafwa kulu, iye yapomba helu lienyi nawa yamukakaminya. Hohene iye yamba ngwenyi: ‘Kanda nulipikala. Iye kali kanawa!’ Ewa, te kali kanawa! Chino te chimwe chikomokeso! Paulu yaneha nawa mukweze wacho ni mwono! Hi mbunga ya atu yipwa ni chiseke.

Ayo eswe yanyina cheka kwilu hanga alie. Paulu yanunga ni chiyulo ndo ni kwilu cha. Kashika yena muuhasa kupwa ni ushindakenyo ngwo Utecho te kechi kuya nawa mutulo! Chocho Paulu, Timoteu ni waze te analinga wenyi hamwe ni ayo yakwata ulungu yaya kwo. Yena unanyingika kuze ayo anakaya?

Paulu te hahwisa ungeji wenyi wamuchitatu wa kwambujola sango jipema, nawa iye te kanafuna ku zuwo. Mu wenyi wacho Paulu te halinga miaka yitatu mu Efwesu ukawenyi. Kashika wenyi uno te uli usuku chinji kuhianyisa wamuchiali.

Muze te hahichika Troa, ulungu yiumana mu Miletu. Muze te haheta hakamwihi ni Efwesu, Paulu yatuma kusanyika makulwana a chikungulwila eze ku Miletu hanga iye ahanjike no ha chisuho cha kasula. Hi muze ola ya kuya cha ulungu te hiyaheta, ayo eswe yevwa yinyengo yinji hakumona chize Paulu anayikwenyi!

Hi kusongo ulungu yiufuna nawa ku Sezarea. Muze te Paulu uchili ku zuwo lia kambaji Fwilipu, profeta Angavu yamutoweza. Iye yamba ngwo Paulu makamusa mu zuwo lia ususu muze iye mafuna ku Yerusaleme. Chochene, che chinakapwa. Hohene muze alingile miaka yaali mu zuwo lia ususu mu Sezarea Paulu yamutuma mu Roma hanga amusopese kuli nguvulu wa A-Roma Sesare. Tutalenu yize yinakapwa mu wenyi wa ku Roma.