AU! UA li cas rau tus tub hluas hauv daim duab no? Zoo li nws raug mob sab kawg. Cov tibneeg uas tawm hauv tsev tuaj saib nws ntawd, muaj ib tug yog Povlauj. Koj puas pom Timaute nyob ntawd thiab? Puas yog tus tub hluas ntawd poob saum lub qhov rais los?

Nws poob saum lub qhov rais los tiag. Hmo ntawd, Povlauj tabtom qhia rau cov thwjtim uas nyob hauv lub moos Rhau-a. Povlauj paub tias ntshe yuav ntev heev nws mam li tau rov tuaj pom lawv, rau qhov hnub tom qab nws yuav caij nkoj ncaim lawv mus. Yog li ntawd, Povlauj thiaj qhia lawv mus txog thaum ib tag hmo.

Tus tub hluas ntawd npe hu ua Yuthikha, nws zaum ntawm lub qhov rais. Nws txawm tsaug zog hlias. Ces nws cia li poob kiag ntawm lub qhov rais mus. Nws poob saum lub tsev txheej 3 mus rau hauv av! Vim li ntawd, cov tibneeg thiaj txhawj heev. Ces thaum lawv mus puag nkaus muab nws tsa sawv, ua ciav nws twb tuag lawm tiag!

Thaum Povlauj pom tias tus tub hluas ntawd tuag lawm, nws cia li pw tsuam saum tus tub hluas lub cev thiab puag nkaus nws. Povlauj hais tias: ‘Txhob txhawj, tsis muaj li cas.’ Ces Povlauj txawm ua ib qho txujci! Nws tsa kiag tus tub ntawd ciaj sawv rov los. Thaum sawvdaws pom li ntawd, lawv zoo siab kawg nkaus.

Lawv sawvdaws rov qab mus saum tsev thiab noj mov ua ke. Povlauj qhia lawv mus txog thaum kaj ntug kiag. Tiamsis tej zaum Yuthikha yuav tsis tsaug zog li qub lawm! Ces Povlauj, Timaute thiab cov neeg uas nrog nkawd ua ke txawm caij nkoj mus lawm. Koj puas paub lawv yuav mus rau qhovtwg?

Povlauj twb mus tshaj tawm txoj xov zoo txawv tebchaws zaum 3 los txog lawm. Nimno nws tabtom yuav mus tsev. Zaum 3 no, Povlauj mus nyob tau 3 xyoos nkaus rau hauv lub nroog Efexau. Yog li ntawd, zaum 3 no nws tseem mus tshaj tawm ntev tshaj zaum 2 thiab.

Tom qab lawv tawm hauv Rhau-a, lub nkoj los nres tau tsis ntev hauv Miletha. Miletha nyob tsis deb ntawm lub nroog Efexau. Povlauj thiaj txib neeg mus hu cov txwj laus hauv lub koom txoos tuaj saib nws ntawm Miletha, kom nws tau nrog lawv tham zaum kawg. Tom qab ntawd, thaum txog caij lub nkoj mus, mas lawv nyuaj siab kawg tsis xav kom Povlauj mus li!

Thaum kawg lub nkoj mam los txog hauv Xixaleya. Povlauj los so hauv tus thwjtim Fili tsev. Muaj ib tug cev Vajtswv lus hu ua Akanpa ceeb toom rau Povlauj tias, thaum Povlauj mus txog nram Yeluxalees mas Povlauj yuav raug kaw. Txawm muaj li ntawd tiag. Ces tom qab Povlauj raug kaw tau 2 xyoos hauv Xixaleya lawm, luag thiaj xa Povlauj mus rau tim Loos mus hais nws rooj plaub ntawm Xixa. Xixa yog tus nom uas kav cov neeg Loos. Cia peb kawm saib tau muaj li cas thaum lawv mus tim Loos.