Omuzandu ngwa ṱire ozomboṱu
EHUNGI 111
Omuzandu ngwa ṱire ozomboṱu
VAKWETU! Ma pe kayenda tjike mba? Omuzandu ngwa rara pehi wa hihamwa tjinene? Tara! Umwe wovarumendu mbu mave zu mondjuwo oPaulus! Timoteus mo mu munu wina mbo? Omuzandu wa u okuza moruiho?
Ii, otjingaperi. Paulus aa yandja ehungi kovahongewa imwi moTroas. Eye aa tjiwa kutja kena ku hakaena nawo rukwao oruveze orure mena rokutja eye aa sokuyenda motjiyaha tjomomeva eyuva ependukirwa raindo. Okutja eye wa hungira ngandu mokati kouṱuku.
Okutja, omuzandu ngwi wena Eutikus wa ri a haama poruiho, okuzambo a rara ozomboṱu ozonḓeu. Arire tja wire pehi okuza moruiho ndwa ri pondendeko oitjatatu yondjuwo! Ovandu opu mave zokumutara nongendo nao. Indu ovarumendu tji va toora omuzandu, pa tjitwa otja paave tira. Eye tjandje wa koka!
Indu Paulus tja muna kutja omuzandu wa ṱu, eye we ke riyumba kombanda ye ne mu pukata. Okuzambo a tja: ‘Amu uruma, eye u nomuinyo!’ Paulus we mu kotora komuinyo momuano omuhimise notjimbumba tjovandu tja ri nonyuṋe tjinene.
Owo avehe va ronda rukwao kombanda nave karya. Paulus wa kayenda komurungu okuhungira nga tji pa tji. Nungwari kara nongamburiro kutja Eutikus kena pa rara rukwao! Okuzambo Paulus, Timoteus na imba mba ri mouyenda punawo va ronda motjiyaha tjomomeva. Ove mo tjiwa kutja owo aave i pi?
Paulus aa mana ouyenda we outjatatu wokuzuvarisa, nu wa ri mondjira okuyaruka konganda. Mouyenda mbwi Paulus wa kara ozombura ndatu erike motjihuro Efesus. Okutja imbwi wa ri ouyenda oure kombanda waimbwi outjavari.
Kombunda yokuza moTroas, otjiyaha tjomomeva mu va ri tja kurama kaṱiṱi moMilete. Mena rokutja otjihuro Efesus tja ri popezu na Milete, Paulus wa hinda omambo kutja ovatarere vombongo ve ye koMilete kokutja eye ma hungire kunawo otjikando otjisenina. Kombunda yanao, indu tji ya ri oruveze rwotjiyaha tjomomeva okuyenda, owo va ri noruhoze okumuna Paulus ama i.
Korusenina otjiyaha tjomomeva tja kotoka koSesarea. Paulus tja ri ama kara pondjuwo yomuhongewa Filipus, omuprofete Agabus wa rakiza Paulus. Eye wa raera Paulus kutja ma karira omukamburwa indu tja i koJerusalem. Nu tjiri, pa tjitwa nao. Okuzambo, kombunda yozombura mbari mondeko moSesarea, Paulus wa hindwa koRoma okukapangurwa i Omukesare ngwaa honaparere po Roma. Indjeye tu tare kutja pa tjitwa tjike mouyenda koRoma.
