Yiwen ilemẓi i teḥweṣ tnafa
TAQSIṬ TIS 111
Yiwen ilemẓi i teḥweṣ tnafa
ACU akka yeḍran dagi? Twalaḍ sin yergazen-agi i d-yuzzlen seg wexxam ɣer weqcic-a yeẓẓlen di lqaɛa? Yiwen seg-sen d Bulus ma d wayeḍ d Timuti. Yella d acu yuɣen aqcic-agi? Ţ-ţiɣlin i d-yeɣli si ṭṭaq? Anɛam, ţ-ţiɣlin i d-yeɣli. Amek i d-yeḍra waya? D ayen ara nwali.
Yuɣ lḥal amceggeɛ Bulus yuɣal-ed seg uṣafer-ines wis tlata. Aṣafer-agi iḍul akteṛ n wis sin imi i geqqim weḥd-es tlata iseggasen di temdint n Ifasus. Umbeɛd, Bulus iɛedda ɣer temdint n Truwas. Dinna yebda yeţmeslay i inelmaden. Meɛna, azekka-nni ilaq-as ad iṭṭef lbabuṛ akken ad isahel. Imi yeẓra belli aṭas n lweqt ara iɛeddin uqbel a ten-iwali tikkelt nniḍen, ikemmel ameslay yid-sen armi i gneṣṣef yiḍ.
Ger wid yeţḥessisen i lxeṭba n Bulus, yella yiwen ilemẓi iwumi qqaren Utikus. Yufa-t-id lḥal yesmeḥsis ɣef yiri n ṭṭaq mi t-tewwi tnafa. Cwiṭ kan akka iwweḍ lqaɛa. Si leɛli wis tlata i d-yeɣli! Ɣef waya i tqellqen wid akk i teţwaliḍ dagi. Mi d-refden ilemẓi-nni, ufan-t yemmut.
Mi gwala Bulus belli yemmut ilemẓi-nni, iẓẓel fell-as yerna iḥelbab-it-id ɣur-es. Mbeɛd yenna: ‘Ur ţţagadet ara. Bxiṛ i gella!’ D ṣṣeḥ, ur yelli d acu yuɣen aqcic-nni! Bulus iḥya-t-id si ger lmeggtin! Wid akk yellan dinna ččuṛen d lfeṛḥ mi walan lbeṛhan-agi.
Ssyin uɣalen akk ɣer tɣurfeţ, ččan lwaḥid. Bulus ikemmel yid-sen ameslay armi d lefjer. Lameɛna yiwen webrid kan i tɛedda ɣef Utikus. Tikkelt-a ur iṭṭiṣ ara! Umbeɛd, Bulus d Timuti akk-d yerfiqen yeddan yid-sen rekben di lbabuṛ. Teẓriḍ sani i ṛuḥen?
Mi ǧǧan tamdint n Truwas, lbabuṛ-nni yeḥbes ciṭ n lweqt di temdint n Mili. Imi tamdint n Ifasus ur tebɛid ara ɣef temdint-agi n Mili, Bulus iceggeɛ ɣer lecyux n tejmaɛt yellan dinna akken a d-ṛuḥen ad ihdeṛ yid-sen tikkelt taneggarut. Umbeɛd, mi d-yewweḍ lawan ad yeqleɛ lbabuṛ, lecyux-nni ḥeznen aṭas axaṭer iḥdeṛ-ed ṛṛwaḥ n Bulus.
Ɣer taggara, lbabuṛ-nni yuɣal ɣer temdint n Qiṣarya. Bulus yerra s axxam n unelmad Filbas anda i t-id-ixebbeṛ yiwen nnbi iţţusemman Agabus. Yenna-yas: ‘Asm’ara tuɣaleḍ ɣer temdint n Yarucalim aţ-ţeţwaḥebseḍ.’ Swaswa d ayen i geḍran. Mbeɛd wwin-t ɣer temdint n Qiṣarya anda yeqqim sin iseggasen di lḥebs. Ssyin ceggɛen-t ɣer temdint n Ṛuma akken ad iɛeddi di ccṛeɛ zdat n uneḥkam Qayṣer. A nwali acu yeḍran deg webrid ara ten-yawin ɣer temdint n Ṛuma.
Lecɣal ixef wis 19 alamma d wis 26.