УЭЙ! Сыт мыбдеж къыщыхъуар? Сыт мы щІалэр щІым щІыщылъыр, Іейщэу техуауэ пІэрэ? Еплъыт, адрейхэм я гъусэу Павели къыщІэжащ! Тимофеи зэрахэтыр плъагъурэ? Мы щІалэр щхьэгъубжэм къыдэхуауэ арауэ пІэрэ?

Ара дыдэщ. Мыбдеж, Троадэм, Павел Хьисэ и гъэсэнхэр иригъаджэт. КхъухькІэ пщэдей ежьэжынути, щІэх зэрызэрымылъагъужынур ищІэт. Абы щхьэкІэ жэщыбг хъуху абыхэм епсэлъащ.

Евтих, арат мы щІалэ цІыкІум и цІэр, щхьэгъубжащхьэм тесурэ жеящ. ЕщІэри, ещанэ къатым и щхьэгъубжэм къыдэхури, щІым къытехуащ! Иджы къыбгурыІуа мыхэр зэхэзежэ щІэхъуар? ЩІалэр къаІэтыжри ялъагъу, псом нэхърэ нэхъ зыщышынар къызэрыхъуар. Ар лІащ!

Павел абы тогъуалъхьэри ІэплІэ хуещІ. ИтІанэ цІыхухэр егъэсэбырыж: «Фымыгузавэ, зыри къыщыщІакъым!» Ар пэжщ! Телъыджэ къэхъуащ! Павел ар къигъэхъужащ! Арати, псори къэгуфІэжащ.

Псори аргуэру унэм щІохьэжри машхэ. Павел нэху щыху абыхэм йопсалъэ. Евтих и нэм жей къызэремыкІуэри плъагъу хуэдэщ! Абы иужькІэ, Павелрэ Тимофейрэ я гъусэхэр ящІыгъуу, кхъухьым йотІысхьэж. ПщІэрэ абыхэм иджы здаунэтІыр дэнэми?

ЩІыпІэ жыжьэхэр къызэхикІухьыну Павел ещанэу щІежьар мэуэ иджыпсту зэфІэкІауэ аращ. Иджы абы унэм егъэзэж. Павел къэтыху Ефес и закъуэ илъэсищкІэ щыІащ. Абы щхьэкІэ мы зы гъуэгу етІуанэу щежьам нэхърэ нэхъ кІыхьлІыхьу къызэфІэкІащ.

Троадэ къыщежьа нэужь, кхъухьыр зэман кІэщІкІэ Милет къыщызэтоувыІэ. Ефес къалэр мыбы километр зыбжанэкІэ фІэкІа зэрыпэмыжыжьэм щхьэкІэ Павел йолъэІу Ефес зэІущІэм и нэхъыжьхэр абы и деж Милет къэкІуэну, иужьрейуэ епсэлъэн щхьэкІэ. Сыту я гум щІыхьат, щызэбгъэдэкІыжыну зэманыр къыщыблэгъам!

ИкІэм–икІэжым кхъухьыр Кесарие къос. Павел еджакІуэ Филипп и унэм здэщыІэм абы хъыбар кърегъащІэ бегъымбар Агав. Абы къещІэ Иерусалим Павел лъэхъуэщым зэрыщрадзэнур. ЗэрыжиІауи къохъу. Кесарие илъэситІкІэ лъэхъуэщым иса нэужь, Павел Рим къалэ яшэ, цезарым, Римым и унафэщІым, и хьэкум тращІэну. КъэдгъащІэт Римым здэкІуэм къэхъуар сытми.