KʼARU kixkʼul li chʼinaʼal? Maare kixtochʼ ribʼ. Li chʼinaʼal kitʼaneʼk tana saʼ li bʼentaan! Saʼ xyanqebʼ li qas qiitzʼin wank li apostol Pablo ut wank ajwiʼ laj Timoteo.

Laj Pablo yook xkʼeebʼal jun li seeraqʼ rehebʼ li xtzolom li Jesus saʼ li tenamit Troas, naq li chʼinaʼal kitʼaneʼk saʼ li bʼentaan. Laj Pablo naxnaw naq inkʼaʼ chik trilebʼ ru li xtzolom li Jesus, joʼkan naq toj kixchoy li xseeraqʼ, tuqtu qʼoqyink kiraqeʼk chi aatinak.

Li chʼinaʼal aʼin aj Eutico xkʼabʼaʼ, kixchunubʼ ribʼ saʼ li bʼentaan chi rabʼinkil laj Pablo. Naq kiwark, kitʼaneʼk. Li ochoch oxibʼ tasal ru, joʼkan naq yookebʼ xkʼaʼuxl li qas qiitzʼin chirix li chʼinaʼal. Naq keʼxwaklesi, keʼxkʼe reetal naq ak kamenaq chik.

Naq laj Pablo kiril aʼin, kixyokobʼ ribʼ saʼ xbʼeen li chʼinaʼal ut kixqʼalu. Tojaʼ naq kixye: ‹Mexkʼoxlak, chirix li chʼinaʼal›. Aʼin jun li sachbʼachʼoolej! Laj Pablo kixwaklesi wiʼ chik chi yoʼyo li chʼinaʼal. Kʼajoʼ naq keʼsahoʼk saʼ xchʼool ebʼ li qas qiitzʼin naq keʼril aʼin!

Chixjunilebʼ kohebʼ wiʼ chik saʼ li rox tasal li ochoch ut keʼok chi waʼak. Laj Pablo kisaqewink chi aatinak. Chʼolchʼo naq laj Eutico inkʼaʼ chik kiwark chi rabʼinkil laj Pablo! Chirix chik aʼan laj Pablo, laj Timoteo ut ebʼ li rochbʼeen keʼok saʼ li jukubʼ. Abʼan, ma nakaanaw bʼar kohebʼ?

Ak yook chi raqeʼk li rox sut naq laj Pablo kixpuktesi li chaabʼil esilal saʼ jalan jalanq chi tenamit. Abʼan kiwank oxibʼ chihabʼ saʼ li tenamit Efeso. Joʼkan naq saʼ li rox sut aʼin laj Pablo kibʼayk chiru li xkabʼ sut naq kiwulak saʼ jalan jalanq chi tenamit.

Naq laj Pablo kiʼelk chaq Troas, li jukubʼ kixaqli saʼ li tenamit Mileto. Li tenamit aʼin moko najt ta wank chiru Efeso. Joʼkan naq laj Pablo kixtaqla xbʼoqbʼal ebʼ li cheekel winq li wankebʼ saʼ li chʼuut re Efeso, re xchaqʼrabʼinkilebʼ xbʼaan naq inkʼaʼ chik trilebʼ ru. Naq laj Pablo xko saʼ li jukubʼ, chixjunilebʼ keʼrahoʼk saʼ xchʼool.

Tojaʼ naq keʼwulak saʼ li tenamit Cesarea. Naq laj Pablo kikanaak saʼ li rochoch laj Felipe, laj Agabo, jun aj kʼanjel chiru li Yos, kixye naq laj Pablo tkʼeheʼq saʼ tzʼalam naq twulaq Jerusalen. Joʼkan tzʼaqal kixkʼul laj Pablo. Ak wiibʼ chihabʼ rokik saʼ tzʼalam laj Pablo aran Cesarea, naq keʼxkʼam saʼ li tenamit Roma, re naq laj Cesar, li awabʼej, traqoq aatin saʼ xbʼeen. Toj tqanaw kʼaru kixkʼul laj Pablo naq xko Roma.