AKUTU! Mbela omumati oo a nangala pedu okwa mona oshiponga? Tala, omulumenhu umwe oo ta di meumbo oPaulus. Mbela ou wete mo yo Timoteus mefano omo? Mbela omumati oo okwa wa mekende ile oshike sha ningwa po?

Heeno, omumati okwa wa monduda yopombada, a pitila pekende. Pefimbo opo, Paulus okwa li ta yandje oshipopiwa kovahongwa vomuTroas. Okwa li e shi shii kutya ite ke va mona vali oule wefimbo lile, molwaashi okwa li e na okuya molweendo noshikepa ongula yefiku la landula. Onghee hano, okwa li a twikila okuyandja oshipopiwa shaye fiyo omokati koufiku.

Omumati oo wedina Eutikus okwa li a kwatwa keemhofi fimbo a li omutumba pekende ta pwilikine koshipopiwa shaPaulus. Ohaluka, omumati oo okwa wa pekende olo la li kedimo etitatu longulu, ndele te lidenge pedu ngaashi u wete mefano omo. Nomolwaasho u wete ovanhu tave mu tale va tila. Eshi omulumenhu umwe e uya ngeno okuyambula po omumati oo, okwa hanga a fya nale.

Ndele eshi Paulus a mona kutya omumati oo okwa fya, okwa nangala kombada yaye, ndele te mu papatele. Opo nee, Paulus okwa ti: ‘Inamu tila, omumati oku na omwenyo.’ Paulus okwa li e mu nyumuna pashikumwifilonga nongudu yovanhu oya li ya hafa neenghono.

Aveshe ova li va shuna natango pedimo lopombada, ndele tava ka lya ouvalelo. Paulus okwa li a twikila okuudifa fiyo kwa sha. Nopehe na omalimbililo, Eutikus ina ka kofa vali nande. Hauxuuninwa, Paulus naTimoteus nosho yo ovaendi pamwe navo ova li va ya noshikepa. Mbela ou shi shii kutya ova li tava i peni?

Paulus okwa hangwa ashike opo a mane olweendo laye olutitatu lokuudifa nokwa li ta shuna keumbo. Okwa li a kala oule womido nhatu moshilando shaEfeso omo amuke, nomolwaasho olweendo laye etitatu ola li lile li dule olweendo laye etivali lokuudifa.

Eshi Paulus va dja muTroas, oshikepa omo va li oya li ya kanghama oule wokafimbo puMileto. Ndele molwaashi Efeso osha li ashike eekilometa dinini okudja muMileto, Paulus okwa li a tuma ovakulunhuongalo vokuEfeso ve uye kuMileto opo a popye navo oshikando shaxuuninwa. Ndele eshi oshikepa ya li pokuya, ovakulunhuongalo ovo ova li va nyika oluhodi neenghono eshi Paulus ta i.

Okudja opo, ova li va shuna noshikepa kuKesarea. Ndele fimbo Paulus a li muKesarea meumbo lomuhongwa Filippus, omuprofeti Agabus okwa li e uya kuye e mu londwele. Okwa li a lombwela Paulus kutya ota ka tulwa modolongo ngeenge okwa i kuJerusalem. Naasho osho naanaa sha li sha ningwa. Ndele eshi Paulus a kala modolongo muKesarea oule womido mbali, okwa li a tuminwa kuRoma opo a ka pangulwe kOmukesari oo a li ta pangele muRoma. Natu ka taleni kutya oshike sha li sha ningwa po fimbo Paulus a li molweendo lokuya kuRoma.