ARRAA! Susoqarsimasoruna? Nukappiaraq nunami nalasoq aqqunarsimava? Takuuk! Angutit illumit anisut ilaat tassaavoq Paulus! Aamma Timoteus takusinnaaviuk? Nukappiaraq igalaakkut nakkarsimanerami?

Aap, taamarpiaq pisoqarsimavoq. Paulusip ajoqersukkat Troasimiittut oqalugiarfigai. Nalunngilaa sivisuumik takoqqissanagit aqaguani umiarsuarmik aallassagami. Taamaattumik unnuap qeqqa tikillugu oqalugiartuarpoq.

Nukappiaraq taanna ateqartoq Euʹtykus igalaap saavani issialluni sinilersoorsimavoq. Uppippoq igalaakkullu nakkarluni ammut init quleriit pingajuanniit! Taava paasissavat suna pillugu inuit taama annilaangatigisut. Nukappiaraq tikikkamikku paasivaat ilimagisamittut toqusimasoq!

Paasileramiuk nukappiaraq toqusoq, Paulus qaanut pallorpoq eqillugulu. Taava oqarpoq: ’Annilaangaqinasi. Ajunngilaq!’ Taamaapporlu! Tupinnartuliaavoq! Paulusip uummarteqqippaa! Inuppassuit nuannaajallaqaat.

Tamarmik majuarput nereqatigiillutillu. Paulus oqalugiartuarpoq ullaanngornera tikillugu. Qularissanngilalli Euʹtykus sinilersooqqinngitsoq! Taava Paulus, Timoteus angalaqatigisaalu umiarsuarmut ikipput. Sumunnartut nalunngiliuk?

Paulusip pingajussaanik oqaluussilluni angalanini ineqqammerpaa, angerlamullu ingerlavoq. Angalanermi tassani Paulus ukiut pingasut Efesusimiippoq. Aappassaanik angalaneranit angalaneq taanna sivisuneruvoq.

Troasimeereerluni umiarsuaq Mileʹtimut talippoq. Efesus ungasinngimmat Paulus oqariartortitsivoq ilagiinni utoqqaanertat Mileʹtimut aggeqqullugit naggataamik oqaluffigiumagamigit. Umiarsuarmillu Paulus aallalermat ungageqaat!

Kiisami umiarsuaq Kæsareamut apuuppoq. Tamaani Paulusip ajoqersugaq Filip najoraa pruffiiti Agabus tikiuppoq Paulus mianersoqquniarlugu. Oqarpoq Paulus tigusarineqassasoq Jerusalemimut tikiukkuni. Taamarpiarlu pisoqarpoq. Taava ukiut marluk Kæsareami parnaarussaareerluni Paulus Romamut aallartinneqarpoq Romamiut kaasariannut eqqartuussassanngorluni.