KI KA kibena kubiwa pa kikye kipikichala? Nanchi awe nsongwalume walaala panshi wikozha kyabaya nyi? Awe mwanamulume ubena kulupuka mu nzubo ye Paulo! Nga Timoti wamumona nyi? Nanchi uno nsongwalume waponene kufuma mu kipenze nyi?

Ee, byo byo kyamwekele. Paulo waambilenga jashi ku baana ba bwanga ba ku Toloasa. Wayukile’mba kechi ukebamonapo jibiji katataka ne, mambo wayilenga na bwato juba jalondejilepo. Onkao mambo, watwajijiletu na kwamba jashi kufikizha ne pakachi ka bufuku.

Uno nsongwalume wa jizhina ja Yutikusa waikele mu kipenze, ne kukupukilwa mu tulo. Waponejile panshi kufuma mu kipenze kya pa nzubo ya busatu peulu! O ene mambo o wamwena bantu saka baji na bulanda. Bantu byo bamushikwilepo, bataine amba wafwa!

Paulo byo amwene kuba’mba nsongwalume wafwa, wamuponejile ne kumukumbata. Kepo aambile’mba: ‘Lekai kuwowakana; mambo mweo wanji uji monka.’ Ne kya kine byo byo kyajinga! Kino kyajinga kya kukumya! Paulo wamusangwile! Bantu batemenwe bingi.

Bonse bakanjijile peulu jibiji na kuja kijiilo. Paulo watwajijile kwamba kufikizha ne kumakya. Bino Yutikusa kechi walaajile jibiji ne! Kepo Paulo, Timoti ne bonse mo bayijilenga bapatamine bwato. Nanchi wayuka ko bayilenga nyi?

Paulo po po apwishishetu lwendo lwanji lwa busatu lo ayile na kusapwila, kabiji wabwelelenga ku nzubo. Pa luno lwendo, Paulo waikele myaka isatu mu muzhi wa Efisesa bunke. Aluno lwendo lwalepele bingi kukila ne lwendo lwa bubiji.

Byo afumine mu Toloasa, wakemene ku Miletusa kimye kicheche. Muzhi wa Efisesa byo ajingatu pepi, Paulo watumine jiwi amba bakulumpe mu kipwilo beye ku Miletusa kuba’mba esambe nabo japeleleko. Panyuma ya bino, byo kyafikile kimye kya kuya kwa bwato, baumvwine bingi bulanda pa kumona Paulo ke aye!

Kyapeleleko, bwato bwafikile ku Kesalea. Paulo byo akikelenga mu nzubo ya mwana wa bwanga Filipa, ngauzhi Agabusa wamujimwineko Paulo. Waambile’mba Paulo bakamukasa umvwe waya ku Yelusalema. Kabiji ne kya kine kino byo byo kyamwekele. Byo aikele mu kaleya pa myaka ibiji mu Kesalea, Paulo bamutwajile ku Loma na kwimana ku kipona kya kije kya kwa Kesala wajinga kalama ku Loma. Twaya tumone kyamwekele pa lwendo lwa kuya ku Loma.