AYE! AYE! Yinke yina kuhoroka apa? Ogu mumati ana rara pevhu ana remana unene ndi? Tara! mugara gumwe ogo ana kupwaga membo kuna kara Paurusa! To mono Timoteusa nage? Ogu mumati kuna gu kekende ndi?

Yimo, eyi yiyo yina horoka. Paurusa ka gava siuyungwa kovarongwa omu moTorowasa. Age ga divire asi kapi nga va mona hena siruwo sosire morwa ga kona kuza nosikepa ezuva lyokukwama ko. Makura ta twikire kuuyunga dogoro pokatji komasiku.

Mumati ogu gedina Eutikusi kwa hingilire pekende, makura ta ponyoka. Ta liganda, a pitire pekende nokugwira pevhu kutunda konzugo zautatu keguru! To mono nye asi yinke vana tukukire ngesi vantu. Vagara apa vana ka damuna mumati, ngamoomu tupu kava yi gazarere. Mumati ana fu!

Paurusa apa ana mono asi mumati ana fu, ta mu rangama peguru nokumulidingira. Makura ta tanta asi: ‘Gwa ha mu pwaga. Mumati muwaawa!’ Eyi mousili! Aso sitetu! Paurusa ana mu tengwidire komwenyo! Ruhafo makura taru gwana mbunga nazinye.

Navenye makura tava zi hena konzugo zekeguru nokukalya. Paurusa ta twikire kuuyunga dogoro tali si. Nye kuvhura o divilise nawa asi Eutikusi kapi ana ponyoka hena! Paurusa naTimoteusa nowo va gendere nawo makura tava rondo mosikepa. Ono diva asi kupi ko vana vyuka?

Paurusa kuna kumanesa tupu rugendo rwendi rwautatu rokuzuvhisa, yiyo ana kuvyuka kembo. Morugendo oru, Paurusa kwa ka kara nomvhura ntatu mositata saEfeso mwelike. Yipo nye asi rugendo oru rure kupitakana rwauvali.

Konyima zokutunda poTorowasa, sikepa tasi ka sikama karuwogona poMiretusi. Morwa Efeso nokilometa tupu dongandi, Paurusa ta tumine vakuronambunga va wize koMiretusi, a ya uyunge nawo sikando sokuhulilira. Konyima, apa sa sikire mo siruwo sikepa si katuke, ee, ngapi tupu omu vana guwu mokumona Paurusa ta zi!

Mouhura sikepa tasi ka tengura poKesareya. Paurusa eyi ana kara apa pembo lyomurongwa Filipusa, muporofete Agabusi ta rondora Paurusa. Age ta tanta asi Paurusa ngava mu tura modorongo apa nga wiza moJerusarema. Ano mousili, eyi yiyo ya horokere. Makura konyima zokukara modorongo nomvhura mbali moKesareya, Paurusa tava mu tumu koRoma a ka kare mompanguro komeho zahompa gwaRoma. Tu tareni asi yinke yina horoka morugendo rokuza koRoma.

Yirugana magaununo 19 dogoro 26.