Icisimicisyo 111: Umusankwa Uwalele Mutulo
MAMA! Mba nindo ilukucitika apa? Kani umusankwa uulele pansi asomenwa ukwakuti? Lolesya! umo pa balalume abalukwisa ukufuma mu ŋanda ni Paulu! Kani wamubona Timote naye? Kani umusankwa aliponene ukufuma pa windo?
Inya, fyopele’fyo e fyacitikile. Paulu alukupele’lyasi ku basambile muno mu Tilowa. Alisibile ati takababonapo nakabili pa mpindi itali nipakuti pa kasuba kakonkapo aali ne kuya ne bwato. Popele alitwalilile ukulabila mpaka na pakati ka busiku.
Uyu musankwa uwilicilwe ati Yutuko aalikele pa windo, kabili aalilele mutulo. Kabili ukupita penka pe windo, aaliponene pansi ukufuma pa ŋanda ya busitatu peulu! Kansi wabona umulandu abantu balukubonekela ababombomene ukwakuti. Ili abalalume bamwimyo’musankwa, cili lukoso koti nifyefyo balukutina. Afwa!
Ili Paulu abona ukweba’ti umusankwa afwa, alala peulu pali ye ne kumufukatila. Eli alabila ati: ‘Mwibombomana yo. Ali cabe bwino!’ Kabili efi ali! Cimpelampela! Paulu amubusya umusankwa! Insangalasi syabekata abali mwi bumba.
Bonse baya peulu nakabili ne kulye’fyakulya. Paulu atwalilila ukulabila mpaka na kumaca. Pano mungacetekela ukweba’ti Yutuko talelepo nakabili! Eli Paulu, Timote na babo ababalukwenda nabo banina mu bwato. Kani waisiba uku balukuya?
Paulu eli asila lukoso ulwendo lwakwe ulwa kutulisya ulwa butatu, kabili ali pa lwendo lwa kubwelelamo kwabo. Pa lwendo ulu Paulu aalikele imyaka itatu mu musi wa Efesa mwenka. Kansi ulu e lwendo ulutali ukucila ne lwendo lwakwe ulwa bubili.
Panuma ili bafumako ku Tilowa, ubwato bwaimakanako pa Mileto pa mpindi inini. Pakuti Efesa ili lukoso amamailosi anini akatalamukila, Paulu atuma abakwita abakulu ba mwi kelesya ati bese ku Mileto pakweba’ti angambala nabo umuku wa kupelako. Panuma yafyefyo, ili yafike’mpindi yakweba ati ubwato bulukuya, mama ifi babombomana pa kubona Paulu alukuya!
Mukupelako ubwato bwabwela ku Kaisalia. Ili Paulu acikala pa ŋanda yakwe Filipo umusambile, Agabo uwakusimika amucenjesya Paulu. Alabila ati Paulu akaba ni kaili ili akesa ku Jelusalemi. Kabili muli bucine, fyenke’fi e fyacitika. Eli, panuma yakuba mwi kati mu Kaisalia imyaka ibili, Paulu bamutuma ku Loma mu kumulubulwisya pa menso akwe Kaisa kateka wa Loma. Leka tubone ifyacitika pa lwendo lwa ku Loma.
Ifyacitilwe ifyapitala 19 ukufika ku 26.
Ifyakwipusya
- Mu cikope, kani ninani umusankwa uyo uulele pansi, kabili findo fyacitikile kuli ye?
- Mba findo Paulu acita ili abona ukweba’ti umusankwa afwa?
- Nipi Paulu, Timote, na babo abo bali nabo pa lwendo balukuya, kabili findo fyacitika ili baimakanako pa Mileto?
- Mba cindo uwakusimika Agabo amucenjesya Paulu, kabili cacitika syani koti nifyopele’fyo ifi uwakusimika alabila?
Ifyakwipusya na fimbi
- Pendeni Ifyacitilwe 20:7-38.
Kani tungaba syani ‘abatabakwete neli kebo akamilopa ya bantu bonse,’ ukulingana ne masiwi akwe Paulu aalembelwe pa Ifyacitilwe 20:26, 27? (Esic. 33:8; Cit. 18:6, 7)
Mba nindo baeluda belelwe ‘ukulukwikatilila isiwi ilyakucetekelwa’ ili balukusambisya? (Cit. 20:17, 29, 30; Tito 1:7-9; 2 Tim. 1:13)
- Pendeni Ifyacitilwe 26:24-32.
Kani Paulu alilipyungisye syani isyuko lyakwe ilyakuba umuLoma pakweba’ti afikilisye umulimo wakutulisya uwo apokelele ukufuma kuli baYesu? (Cit. 9:15; 16:37, 38; 25:11, 12; 26:32; Luku 21:12, 13)
