ເດັກຊາຍຜູ້ຊຶ່ງເຜີຫຼັບໄປ
ບົດ 111
ເດັກຊາຍຜູ້ຊຶ່ງເຜີຫຼັບໄປ
ໂອ້! ໂອ້! ມີຫຍັງເກີດຂຶ້ນທີ່ນີ້? ເດັກຊາຍຜູ້ຊຶ່ງນອນຢູ່ກັບພື້ນດິນນັ້ນບາດເຈັບສາຫັດບໍ? ເບິ່ງພຸ້ນ! ຊາຍຊຶ່ງພວມອອກມາຈາກເຮືອນນັ້ນຄືໂປໂລ! ເຈົ້າເຫັນຕີໂມເຕດ້ວຍບໍ? ເດັກຊາຍນັ້ນໄດ້ພັດຕົກຈາກປ່ອງຢ້ຽມບໍ?
ຈ້າວ ນັ້ນຄືສິ່ງທີ່ໄດ້ເກີດຂຶ້ນ. ໂປໂລພວມໃຫ້ຄຳບັນຍາຍແກ່ພວກສາວົກທີ່ນີ້ໃນເມືອງໂທອາດ. ເພິ່ນຮູ້ວ່າຈະບໍ່ເຫັນໜ້າພວກເຂົາອີກເປັນເວລາດົນນານເພາະເພິ່ນຈະຕ້ອງຈາກໄປທາງເຮືອວັນຖັດໄປ. ດັ່ງນັ້ນເພິ່ນຈຶ່ງໃຫ້ຄຳບັນຍາຍຕໍ່ໄປຈົນເຖິງທ່ຽງຄືນ.
ເອົາລະ ເດັກຊາຍຄົນນີ້ຊື່ເອິຕີກນັ່ງຢູ່ທີ່ປ່ອງຢ້ຽມແລະເຜີຫຼັບໄປ. ເຂົາພັດຕົກລົງມາຈາກປ່ອງຢ້ຽມຊັ້ນທີສາມເຖິງພື້ນດິນ! ດັ່ງນັ້ນເຈົ້າຄົງນຶກໄດ້ວ່າເປັນຫຍັງຄົນເຫຼົ່ານີ້ຈຶ່ງເບິ່ງເປັນທຸກກັງວົນຫຼາຍແທ້. ເມື່ອພວກຜູ້ຊາຍຍົກເດັກຫນຸ່ມຂຶ້ນມາ ກໍ່ເຫັນວ່າເປັນໄປດັ່ງທີ່ພວກເຂົາຢ້ານຢູ່. ເດັກຫນຸ່ມນັ້ນຕາຍແລ້ວ.
ເມື່ອໂປໂລເຫັນວ່າເດັກຊາຍນັ້ນຕາຍແລ້ວ ເພິ່ນກໍ່ນອນທັບເທິງຕົວຂອງເຂົາແລະກອດຕົວເດັກນັ້ນໄວ້. ແລ້ວເພິ່ນກ່າວວ່າ: ‘ຢ່າເປັນທຸກເລີຍ. ເຂົາບໍ່ເປັນຫຍັງດອກ!’ ແລະກໍ່ເປັນດັ່ງນັ້ນແທ້ໆ! ນັ້ນເປັນການອັດສະຈັນ! ໂປໂລເຮັດໃຫ້ເຂົາກັບມີຊີວິດອີກ! ຝູງຊົນຕ່າງກໍ່ຊື່ນໃຈຍິນດີຍິ່ງ.
ທຸກຄົນຂຶ້ນໄປຊັ້ນເທິງອີກແລະກິນເຂົ້າ. ໂປໂລເວົ້າຕໍ່ໄປຈົນເຖິງແຈ້ງ. ແຕ່ເຈົ້າຈະແນ່ໃຈໄດ້ວ່າເອິຕີກຈະບໍ່ງ້ວງນອນຫຼັບໄປອີກ! ແລ້ວໂປໂລ ຕີໂມເຕແລະພວກທີ່ເດີນທາງດ້ວຍກັນໄປລົງເຮືອ. ເຈົ້າຮູ້ບໍວ່າພວກເຂົາຈະໄປໃສ?
ໂປໂລຈວນຈະສຳເລັດການປະກາດຮອບທີສາມຂອງເພິ່ນ ແລະພວມຈະເດີນທາງກັບບ້ານ. ໃນການເດີນທາງຮອບນີ້ໂປໂລພັກໃນເມືອງເອເຟດເປັນເວລາສາມປີ. ດັ່ງນັ້ນການເດີນທາງຮອບນີ້ຈຶ່ງນັບວ່າດົນກວ່າຮອບທີສອງຂອງເພິ່ນ.
ຫຼັງຈາກອອກຈາກເມືອງໂທອາດ ເຮືອກໍ່ໄປແວ່ທີ່ເມືອງມີເລດຊົ່ວຂະນະນຶ່ງ. ເພາະເມືອງເອເຟດຢູ່ຫ່າງພຽງບໍ່ກີ່ກິໂລແມັດ ໂປໂລຈຶ່ງໄດ້ເຊີນພວກຜູ້ປົກຄອງໃນປະຊາຄົມໃຫ້ມາຍັງເມືອງມີເລດ ເພື່ອເພິ່ນຈະໄດ້ສົນທະນາກັບເຂົາເປັນເທື່ອສຸດທ້າຍ. ເມື່ອເຖິງເວລາເຮືອຈະອອກ ພວກເຂົາເສົ້າໃຈຫຼາຍທີ່ໂປໂລຈະຈາກໄປ!
ໃນທີ່ສຸດເຮືອກໍ່ກັບມາເຖິງເມືອງເຊຊາເຣ. ຂະນະທີ່ໂປໂລຢູ່ທີ່ນີ້ເພິ່ນພັກຢູ່ເຮືອນຂອງສາວົກຜູ້ທີ່ຊື່ຟີລິບ ຜູ້ທຳນວາຍອາກາບຶເຕືອນໂປໂລໃຫ້ຮູ້ວ່າ ເພິ່ນຈະຖືກຂັງຄຸກເມື່ອໄປເຖິງເຢຣຶຊາເລມ. ແລະເຫດການນີ້ກໍ່ເກີດຂຶ້ນແທ້ໆ. ແລ້ວຫຼັງຈາກທີ່ໂປໂລຖືກຂັງຄຸກໃນເມືອງເຊຊາເຣເປັນເວລາສອງປີ ໂປໂລຖືກສົ່ງໄປນະຄອນໂລມເພື່ອແກ້ຄະດີຕໍ່ໜ້າເຊຊາຜູ້ປົກຄອງໂລມ. ຈົ່ງໃຫ້ເຮົາເບິ່ງວ່າມີຫຍັງເກີດຂຶ້ນລະຫວ່າງການເດີນທາງໄປນະຄອນໂລມ.