EE! KE bika’le pano? Mwanuke mwana-mulume ulēle panshi’u i mukotoke? Tala! mwana-mulume utamba panja’wa i Polo! Mwene ubamone ne Temote kokwa? Lelo uno mwanuke wapone pa dididisha’ni?

I amo, wapone. Polo wadi unena mwisambo ku meso a bana ba bwanga ba mu Toasa. Wayuka’mba, byasa kwenda kesha lwa kyombo, kakikemonepo nabo panopano. Penepo waendelela na kunena kufika ne pa kankatyi ka bufuku.

Ebiya uno mwanuke witwa bu Yutekusa wadi ushikete pa dididisha, penepo walāla. Kupwa watentuka pa dididisha ne kupona panshi tamba pa kapala ka busatu! Ye mwanda umwene bantu bāya beumbile. Ino pa kumuboya, kibaikala’nka mobadi bakaminwe. Abamutana mufwe!

Polo pa kumona’mba wafu, walāla padi ne kumufumbakanya. Kupwa wanena’mba: ‘Kemukitompolai. Udi’nka biyampe!’ Nanshi i bine! I kingelengele! Polo wamusangula! Kibumbo kyonso kibasangala bikomo.

Kupwa bonso abakanda monka pangala ne kudya bidibwa. Polo waendelela na kunena kufika ne ku lubanga. Inoko Yutekusa kasomwenwepo kulāla dikwabo! Ebiya Polo, Temote ne bendi nandi bakwabo abaikila mu kyombo. Uyukile kobenda?

Pano Polo kavuya lwendo lwa busatu lwa busapudi, kajokela kwandi. Mu luno lwendo Polo waije, bunka bwandi, myaka isatu mu kibundi kya Efisesa. Nanshi luno i lwendo lulampe kupita lwa bubidi.

Kupwa kutaluka mu Toasa, kyombo kibaimana bityetye mu Miletusa. Bidi ku Efisesa i kwīpi, Polo waityija bakulumpe ba mu kipwilo ku Miletusa mwanda wa kwisamba nabo dya mfulo. Kyombo pa kushunuka, abakwatwa bulanda pa kumona Polo wenda!

Ku mfulo kyombo kibajokela ku Kesalea. Polo pa kushikata ku njibo ya mwanā bwanga Fidipa, mupolofeto Akabusa wamudyumuna. Wanena’mba Polo usa kukutwa shi wafika ku Yelusalema. Bine, kibafikila monka. Ebiya, pa kupwa kukutwa umbula bwa myaka ibidi mu Kesalea, Polo watumwe amba akatwejibwe mu kidye ku Loma kudi Kesala mbikavu Mwine Loma. Tutalei byakamufikile mu lwendo lwa ku Loma.