Chihande 111

Mukweze Anongokele

MAMAYAMI! Chuma chika chinakusoloka hano? Uno mukweze nasavala hamavu navulumuka chikuma tahi? Tala! hamalunga vanakulovoka muzuvo hali naPaulu! Unamumono Chimoteu nyi? Uno mukweze naholoka kufuma munjanena tahi?

Eyo, mukiko vene chasolokele. Paulu ahanjikile kutumbaji kuno kuTolowa. Ejivile ngwenyi keshi kukavamona chekako halwola lwalusuku mwomwo ajinyine kukatuka nawato lichako. Ngocho atwalileho nakuhanjika namukachi kaufuku.

Kahou mukweze Yutuku atwamine munjanena, jino anongokele tulo. Andumukile munjanena, nakuholokele hamavu kufuma kuzuvo yahelu yamuchitatu! Shikaho wamono vatu vanalizakamina chiyovo. Malunga hakumunona mukweze, kwijiva vene nge muze vashinganyekanga. Nafu lyehi!

Paulu hakumona ngwenyi mukweze nafu lyehi, himwaulumana hali ikiye nakumusangachila. Jino ngwenyi: ‘Kanda namulizuzukilako. Ali tuhu kanawa!’ Mukiko vene! Chuma chakukomwesa! Paulu namusangula! Lizavu lyosena lyawahililile nyi kuyamuze.

Vosena hikukinduluka cheka kuzuvo yahelu nakulya. Paulu atwalileho nakuhanjika navo nomu kunachi. Enga, Yutuku kahashile kuya nakusavala chekako! Jino Paulu, Chimoteu navaze vanakutambuka navo hikunyina muwato. Unejiva okwo vali nakuya?

Paulu anakukumisa ungeji wenyi wakuya nakwambulula wamuchitatu, mangana akinduluke kwimbo. Haungeji kanou Paulu atwaminenga kaha kuEfwesu myaka yitatu. Shikaho uno ungeji unapu wausuku kuhambakana wamuchivali.

Hakufuma muTolowa, wato wasulikile chindende muMiletu. Hakuwana nge Efwesu yapwile hakamwihi, Paulu himwatumako lizu nakusanyika vakulwane jaliuka veze kuMiletu mangana avashike. Kahomu unasunuka wato, ocho kulinyenga kana hakumona Paulu uze mwaya!

Kutwala muze wato we-e muKesaliya cheka. Shimbu Paulu anakutwama kuno muzuvo yakambaji Fwilipu, kapolofweto Angavu himwalweza Paulu azangame. Ngwenyi Paulu vanakuya nakumukasa kuYelusalema. Kaha mukiko chapwile vene ngocho. Jino, hakutwama myaka yivali mukamenga muKesaliya, Paulu hikumutuma kuLoma vakamusopese kuli mwangana wavaLoma, Kesale. Tutalenu kanawa ovyo navisoloka haungeji wakuya kuLoma.

Vilinga tupetulu 19 swi naku 26.