Sturka 111

Tuktan Kum Yapan Ba

ALAI, dupali aihwa! Tuktan kum tasba ra kauhwi prawi ba latwan brin luki? Waitna wal utla bila wina taki aula ba Pâl Timoti wal. Sakuna tuktika ba ra dia takan ki?

Pâl ba Troas ra disaipel nani ra smalki kan. Kan witin nu kan disaipel nani ra pyu ailal ra kli kaikaia apia kan ba, witin yuka wala ba duri tara wal impakai kan. Bara witin tihmia 12 aklak kat smalki kan.

Tuktika ba nina Yutikus maki kan, witin windar purara iwi kan ba kat yapan. Bara witin utla kum plur yuhmpa bri kan windarka pura wina kauhwan! Baha mita upla nani ba wari taki baku kaikisma. Kan witin nani luki kan tuktika ba pruan, bara waitna nani mita alki bukan taim, rait pruan kan.

Pâl tuktika ba kaikan pruan kan, bara witin baui ai klahkla ra buki brih, naku win: ‘Wari taki bangwpara. Witin pain sa!’ Bara baha ba rait sain tara daukanka kum kan! Kan witin mita tuktika ba ra kli raki bukan! Bara upla nani ba baha kaiki, uba lilia taki bangwan.

Baha ningkara witin nani purara uli, plun kum pih bangwan. Pâl ba yu baiwan kat ban smalki kan. Sakuna yawan diara kum pain nu ba Yutikus kli yapbia apia kan ba! Baha ningkara Pâl, Timoti bara wala witin nani aikuki tauki kan nani ba, duri tara ra aimaki bangwan impakaia wisi. Man nu sma anira auya kan?

Pâl aima yuhmpa ra smalki tauki warkka dauki kan. Bara witin naha impakanka yuhmpika ba tnata praki kan. Naha impakanka ra Epesus taunka ra mani yuhmpa takaskan. Baha mita naha impakanka yuhmpika ba kau aihwa kan walka daukan ba wal.

Witin nani Troas taunka wina takan ningkara, Mailitus ra wiria takaskan. Kan Epesus baha lamara kan, baha mita Pâl bui Epesus kangrigishanka almuka nani ra Mailitus ra paiwan, aima las witin nani ra aisaia dukyara. Baha ningkara upla nani ba kaikan Pâl ba duri tara ra aimaki mahka auya kan taim, nahki sari taki bangwan!

Las kat duri tara ba kli Sesaria ra wan. Bara Pâl ba disaipel Pilip watla ra takaskan, baha ra prapit Agabus mita Pâl ra win Jerusalem ra wabia taim alki silak ra mangkbia. Bara Agabus dia win ba kat takan. Pâl ra Sesaria ra mani wal baku silak ra mangki brisi, Rom ra blikan wan Sisar mita lâka daukbia dukyara. Kaisa Rom ra impaki kan pyua ra dia takan ba kaikaia.

Wark nani sapta 19 wina 26 kat.