UO HUE! Vika evi vi na soloka aha? Ou mukuendze na kosa ha mavu na vulumuka cikuma ni? Tala, umo ua vamala va li na ku tuhuka mu ndzivo ikeye Paulu! Ua mono Timoteo ha kati kavo, ni?

Evi vikevio via solokele. Paulu ua kele na ku ambuluila vandongesi va mu Toloase. Ua tantekeyele ngueni ka ku va mono naua mu ntsimbu ya kama muomu lia mukuavo ue ku londele mu vuato. Ngeci ua tualeleho ku handeka na mu kati ka vutsiki.

Ou mukuendze ua lizina Yutiku ua tumamene ha njanena, ua nengukile. Ngeci ua lahukile kaha ua uile, ha vulaha vua vindzivo vitatu via ku litumbakana! Ngeci vantu va lisosomuene cikuma. Omo vantu va mu katuile va tantekeyele nguavo na tsi!

Omo Paulu ua muene ngueni mukuendze na tsi, ua mu salamene na ku mu vumbatela. Kaha ua handekele ngueni: ‘Kati mu lisosomue. A li mua cili!’ eyo a li mua cili! Eci ci na pu cikomoueso! Paulu na mu sangula! Vantu va viukilile cikuma.

Kaha va londele naua kuilu na ku lia. Paulu ua tualeleho ku handeka noho kua cele. Vunoni u hasa ku kala na vusunga nguove Yutiku ka nengukile naua! Kaha Paulu, Timoteo na vaze vendele navo va londele mu vuato. Ua tantekeya kuli va ile ni?

Paulu ua manusuile vungendzi vueni vua mu citatu vua ku ambulula, kaha ua kele na ku hiluka kuimbo. Mu vungendzi vuze, Paulu ua kele miaka itatu lika lieni mu mbonge ya Efeso. Ngeci mukemuo ovu vungendzi vua laha cikuma ku tuvakana na vua mu civali.

Mu va fumine mu Toloase, va tutikile vuato mu Miletu mu ntsimbu ya indende lika. Mu ku linga Efeso ya kala ha hiehi, Paulu ua sikile linga vakuluntu va cikungulukilo ca mu mbonge ize linga veze ku Miletu, linga a handeke navo lua ku manusuila. Omo ya hetele ntsimbu ya ku sunuka ca vuato, va vuile vusiua vua kama ku mona Paulu a li na ku ya!

Mu ku sulumuina, vuato vua ka tutikile ku Sesaliya. Ntsimbu Paulu ua kele kuze, ku ndzivo ya ndongesi Filipu, kapolofeto Angambu ua mamuine Paulu, ngueni, omo a ka ya ku Yelusalema va ka mu haka mu kamenga. Kaha cili vene via lipuisilemo. Omo Paulu ua kele mu kamenga ka ku Sesaliya miaka ivali, va mu tualele ku Loma linga va ka mu sompese kuli Sezale, muangana ua Loma. Tu ci tale vika via solokelele mu vungendzi vua ku ya ku Loma.