Se telpoch tein kochik
Tanojnots 111
Se telpoch tein kochik
¡XIKITA! ¿Toni mochiujtok nikan? ¿Motelkokoj telpoch tein uetstok talpan? ¡Xikita, semej takamej tein kalankistok yejua Pablo! ¿No ueli tikita Timoteo nikan? ¿Timoluia ika pauetsik itech ventana telpoch?
Kemaj, yejua nejon mochiuak. Pablo moajsia Troas uan ompa kinimakatoya se tamachtilis imomachtijkauan Jesús. Yej kimatia ika amo niman kinitaskia porin mostika monekia kisas ika barco. Yejika tajkoyoualtij tamachtijtoya.
Tein mochiuak, nejin telpoch tein motokaytij Eutico, tokotsyetoya itech se ventana tein moajsia itech se kali eyi ixnepantik. ¡Ompa kochtiaj uan pauetsik! Yejika ueli tikinita keyej taltikpakneminij moteltekipachojtokej. Keman takamej kiajokkej telpoch, ¡kiitakej ika momikilij! Uan ipa yejua nejon kimouilijtoyaj.
Keman Pablo kiitak ika telpoch momikilij, ipan motekak uan kinapaloj. Ompa kijtoj: ‘Amo ximotekipachokan. ¡Telpoch kuali yetok!’ ¡Uan ijkon mochiuak! ¡Katka se mouiskatekit! ¡Pablo kiajokuik! Uan sepasaj yolpakkej nochin taltikpakneminij tein ompa yetoyaj.
Nochin oksepa tejkokej uan peuak takuaj. Pablo kisentokak tamachtijtoya uan ijkon tanesik. ¡Sayoj ika ueli tikyekmatij ika Eutico amo kochikok! Ompa, Pablo, Timoteo uan tein imiuan yayaj tejkokej itech barco. ¿Tikmati kani yajkej?
Pablo matantoyaya iexpatika takalpanolis ika tanojnotsalis. Itech nejin takalpanolis Pablo yetoya eyi xiuit sayoj itech altepet Efeso. Yejika, okachi uejkauaskia, amo kemej ojpatika.
Satepan keman kiskej Troas, barco tepitsin motsakuilij Mileto. Uan kemej amo tel uejka moajsia Efeso, Pablo kininotsak takamej tein okachi xiuejkej tein moajsiaj itech kalnechikol Efeso, maj yanij Mileto uan ompa sayojya kininojnotsaskia. Satepan, keman barco kistiayaya, ¡moteltayokoltijkej keman kiitakej Pablo yajki!
Ompa, barco mokepak Cesarea. Keman Pablo mokalotijtoya ichan Felipe, se imomachtijkauj Jesús, tanauatijkej Agabo kijtoj ika keman Pablo ajsiskia Jerusalén kitsakuaskiaj. Uan yejua nejon mochiuak kemej kijtojka Agabo. Uan satepan keman Pablo tsaktoya ome xiuit Cesarea, kititankej Roma, kampa kixkomakaskia César, tekiuaj romano. Tikitatij toni kipanok keman yajtoya Roma.
