Se telpochtli okochki
TLAPOUALISTLI 111
Se telpochtli okochki
¡XIKITA! ¿Tlen panotok nikan? ¿Omokojkoko miak nin telpochtli tlen kajki ipan tlali? ¡Xikita, se itech tlakamej tlen kisaj itech kali ye Pablo! ¿Noijki ueli tikita Timoteo ompa? ¿Okatka nin telpochtli itech ventana uan ouetsiko?
Kema, ijkon opanok. Pablo okintlapouijtoka sekimej tlaneltokakej tlen okatkaj itech Troas. Ye okimatiaya ayakmo oksepa kinmitaskia pampa mostlatika omonekiaya yas itech se barco. Ik non, ok okintlapouijtoka maski yitlajkoyoak.
Nin telpochtli omotokayotiaya Eutico, ye omotlali itech ventana, uan okochki. ¡Nin telpochtli ouetski eyi pisos pampa tlakxitlan! Ik non, ueli tikita tleka tlaltikpaktlakamej omotekipachojkej miak. Ijkuak okeualtijkej nin telpochtli okitakej omikik.
Ijkuak Pablo okitak nin telpochtli omikik, omotekak ipan uan okinapalo. Ijkuakon, okinmilui: ‘Amo ximotekipachokan. ¡Ye kuali kajki!’. ¡Non kema melauak! ¡Omochi se milagro! ¡Pablo okiyoliti! Nochtin tlen ompa okatkaj melauak oyolpakej.
Satepan, nochtin oyajkej kalijtik uan otlakuajkej. Pablo ok okintlapoui nochi yoak. ¡Maski ijkon, Eutico ayakmo okochki oksepa! Ijkuakon, Pablo, Timoteo uan akinmej imiuan oyayaj otlejkokej itech barco. ¿Tikmati kanin oyajkej?
San tepitsin okipoloaya Pablo pampa kitlamiskia itetlapouilis ijkuak eyijpa uejka otetlapouito. San itech altepetl Éfeso omoka eyi xiuitl. Ik non, axkan okachi ouejka amo ken ijkuak ojpa oyajki otetlapouito.
Satepan barco okiski itech Troas, tepitsin omoka itech Mileto. Ken Éfeso amo uejka omokauaya, Pablo okinnotski nochtin tlayekankej itech Éfeso pampa ma yakan Mileto pampa okinekiaya saiktlami kintlapouis. Satepan, ijkuak barco oyaya, yejuan melauak omoyolkokojkej miak ijkuak Pablo oyajki.
Saiktlami, barco omokuepki Cesarea. Ijkuak Pablo omoka ikalijtik Felipe, teotlajtojki Ágabo okijto ijkuak Pablo ajsiskia Jerusalén, ompa kitsakuaskiaj itech telpiloyan. Uan opanok ijkon ken okijto Ágabo. Uan ijkuak opanok ome xiuitl Pablo yotsaktoka itech Cesarea, okititlankej Roma, pampa tekiua romano César kijtoskia tlen kichiuiliskiaj. Ma tikitakan tlen opanok ijkuak oyajki Roma.
