AKWETU! Oshike tashi ningwa mpaka? Omumati ngoka a lala pevi okwe ehama mbela unene? Tala! Gumwe gwomaalumentu mboka taa zi megumbo, oye Paulus. Timoteus naye ou mu wete wo mpoka? Omumati okwa gu mbela pekende?

Eeno, osho naanaa shoka sha ningwa po. Paulus okwa ningile aalongwa oshipopiwa mpaka muTroas. Ye okwa tseya kutya ite ke ya mona we mbala, oshoka esiku lya landula ye okwa li e na okuya nosikepa. Ano ye okwa popi sigo omokati kuusiku.

Omumati nguka gwedhina Eutikus okwa li a kuutumba pekende nokwa kwatwa koomposi. Ye okwa gu okuza pekende po pwene lyontala ontitatu e ta gwile pevi! Ano oto vulu okuuva ko molwashike aantu taa monika ya kumwa ngawo. Sho aalumentu taa toola po omumati, osho naanaa ngaashi yo ya dhiladhila. Ye okwa sa!

Sho Paulus ta mono kutya omumati okwa sa, ye ota lala kombanda ye note mu papatele. Opo nduno ye ota ti: ‘Inamu kala mwa tila. Ye oku li nawa!’ Nosho naanaa shi li ngaaka! Osho oshikumithalonga! Paulus okwe mu yumudha! Ongundu yaantu otayi ligola kenyanyu.

Yo ayehe otaa shuna ishewe pombanda notaa li. Paulus ota popi sigo taku ningi koongulasha. Ihe oto vulu okukala nuushili kutya Eutikus ina kwatwa we koomposi! Opo nduno Paulus naTimoteus naaendi ooyakwawo otaa yi mosikepa. Owa tseya mbela kutya openi yo taa yi?

Paulus okwi ipyakidhila nokumana olweendo lwe lwetumo olutitatu noku li mondjila okuya kegumbo. Pethimbo lyolweendo nduno Paulus okwa kala oomvula ndatu moshilando Efeso. Ano olwo nokuli olweendo olule lu vule olweendo lwe olutiyali.

Sho osikepa tayi thigi po Troas, yo otayi kankama okathimbo muMileto. Molwashoka okuza mpoka okuya kuEfeso opu na owala ookilometa dhontumba, Paulus ota tumu elaka kaakuluntu yegongalo ye ye kuMileto opo ye a vule okupopya nayo oshikando shahugunina. Alikana osha li she ya yematitha ngiini okutopoka naPaulus sho ethimbo lyokuya kwosikepa lya thikana!

Lwahugunina osikepa otayi ya pu-Kesarea. Manga Paulus e li megumbo lyomulongwa Filippus, omuprofeti Agabus ota londodha Paulus. Ye ota ti kutya Paulus ota ka ninga onkwatwa ngele e ya kuJerusalem. Nosho naanaa sha ningwa. Sho ye a li oomvula mbali mondholongo muKesarea, Paulus okwa tuminwa kuRoma a ka hokololithwe komupangeli gwaRoma Omukeesali. Natu tale shoka sha ningwa po pethimbo lyolweendo lwokuRoma.