TALA vala! Oityi tyikahi nokupita apa? Okuti omukuendye ou walangala pohi weliveta unene? Omulume oo ukahi nokulupuka mondyuo o Paulu. Tupu Timoteo umuluete? Okuti omukuendye ou watoka pondyanena?

Enga, watoka pondyanena. Paulu ankho ukahi mo Troade nokulingila ovalongwa elongomona. Paulu ankho utyii okuti makakala omuvo omunyingi kokule novalongwa. Mokonda ankho maende oungendi nombapolo monthiki onkhuavo. Moluotyo, watualako nokupopia alo mokati kounthiki.

Omukuendye ou utiwa o Eutiku ankho waumphama pondyanena, iya aende kotumphoki. Waanguka, iya atokela pohi. Otyo ovanthu ankho vasukalalela unene, mokonda ondyanena ankho ikahi unene peulu. Etyi veya okumukuata, omukuendye ankho wankhia.

Etyi Paulu amona okuti omukuendye utupu omuenyo, walangala kombanda yae emukondekapo. Konyima apopi okuti: ‘Muahasukalalei. Omukuendye ukahi nawa.’ Tyotyili ankho ukahi umue nawa. Olio ehuviso! Paulu wemututilisa. Ovanthu avahambukwa unene.

Aveho valonda vali avanyingila mondyuo opo vakalie. Iya Paulu atualeko nokupopia alo kuatya. Mahi upondola okukala nonthumbi yokuti Eutiku kaile vali kotumphoki. Iya Paulu, na Timoteo navana ankho vaenda navo avalondo mombapolo. Utyii opi vaya nako?

Paulu ankho wamanuhula oungendi wae watatu wokuivisa Ondaka ya Huku, iya ankho pahe ukondoka keumbo. Moungendi ou, Paulu wakala omanima etatu mepundaumbo lio Efesu. Ngotyo moungendi ou, Paulu wakalako vali ehimbwe tyipona moungendi wae wavali.

Etyi vatunda mo Troade, ombapolo aitalama okamuvo kehehi mo Miletu. Iya mokonda o Miletu ankho ikahi popepi nepundaumbo lio Efesu, Paulu atumu okuihana ovakulu veuaneno lio Efesu veye ko Miletu, opo Paulu apopie navo otyikando tyahulako. Etyi omuvo wehikapo opo ombapolo yende, ovakuatate ovo avanumana unene okutala Paulu ukahi nokuenda.

Okuhulako, ombapolo yakondoka ko Sesareia. Puetyi Paulu ankho ekahi kondyuo yomulongwa utiwa o Filipe, omuuli Agabu walondola Paulu. Wapopia okuti Paulu makakuatwa tyina amehiki mo Jelusalei. Iya atyiende umue ngetyi tyatolwa nomuuli oo. Paulu wakala omanima evali mokaleya mo Sesareia. Konyima, atumikiswa ko Roma opo akakoyeswe na Sesale omutumini wo Roma. Tutalei etyi tyapita moungendi wae wokuenda ko Roma.