ӔЛЛӔХ! Уый цы ’рцыд? Ацы лӕппу йӕхи ныццавта, ӕви? Ӕркӕс ма! Иннӕ адӕмимӕ иумӕ хӕдзарӕй ралидзы Павел! Тимофейы дӕр дзы уыныс? Кӕд лӕппу рудзынгӕй рахауд?

Ӕцӕгдӕр афтӕ рауад. Ам, Троадӕйы, Павел ныхас кодта ахуыргӕнинӕгтимӕ. Дыккаг бон ӕй цӕуын хъуыди науыл, ӕмӕ зыдта, ныр сӕ тагъд кӕй нал фендзӕн. Уымӕ гӕсгӕ суанг ӕмбисӕхсӕвмӕ семӕ ныхас кодта.

Евтих та, афтӕ хуынди уыцы лӕппу, рудзынгыл бадти ӕмӕ афынӕй. Ӕмӕ куы базмӕлыд, уӕд ӕртыккаг уӕладзыджы рудзынгӕй рахауд ӕмӕ зӕххыл сӕмбӕлд! Уӕдӕ ныр ӕмбарыс, адӕм афтӕ тарстхуыз цӕмӕн сты, уый. Куы йыл схӕцыдысты, уӕд федтой, тынгдӕр цӕмӕй тарстысты, уый йыл кӕй ӕрцыд. Лӕппу уыди мард!

Павел уый куы федта, уӕд ыл ӕрхуыссыд ӕмӕ йӕ ӕрбахъӕбыс кодта. Уый фӕстӕ дзуры: «Ма тыхсут. Дзӕбӕх у!» Ӕмӕ ӕцӕгдӕр, диссаг! Павел лӕппуйы райгас кодта! Адӕм фырцинӕй цы акодтаиккой, уый дӕр нал зыдтой.

Се ’ппӕт дӕр фӕстӕмӕ уатмӕ схызтысты ӕмӕ иумӕ ӕхсӕвӕр бахордтой. Ӕмӕ та Павел сӕумӕрайсоммӕ семӕ ныхас кӕны. Фӕлӕ ныр Евтихӕн йӕ хуыссӕг фӕлыгъд! Уый фӕстӕ Павел, Тимофей ӕмӕ се ’мбӕлццӕттӕ науыл сбадтысты. Сӕ фӕндаг кӕдӕм у, уый зоныс?

Фӕци Павелы ӕртыккаг уацамындон балц ӕмӕ ныр фӕстӕмӕ хӕдзармӕ здӕхы. Йӕ балцы рӕстӕджы ӕрмӕст Ефесы фӕци ӕртӕ азы бӕрц. Уымӕ гӕсгӕ йын ацы балц дыккаг балцӕй фылдӕр ахаста.

Троадӕйӕ куы ацыдысты, уӕд нау цыбыр рӕстӕгмӕ ӕрлӕууыд Милиты. Ефес уырдӕм хӕстӕг у, ӕмӕ уымӕ гӕсгӕ Павел Ефесы ӕмбырды хистӕр нӕлгоймӕгтӕм арвыста, хӕццӕ мӕм кӕнут Милитмӕ, фӕстаг хатт ма уемӕ аныхас кӕнон, зӕгъгӕ. Ӕмӕ ма ахъуыды кӕн, Павелӕн фӕндараст зӕгъыны рӕстӕг куы ’рцыд, уӕд уыцы ӕфсымӕртӕ куыд тынг хъыг кӕнынц!

Ӕппынфӕстаг нау ӕрхӕццӕ Кесаримӕ. Павел ӕрлӕууыд иу ахуыргӕнинагмӕ, Филипп, зӕгъгӕ, ӕмӕ йын уым пехуымпар Агав загъта, Иерусалиммӕ куы ’рцӕуа, уӕд ӕй кӕй ӕрцахсдзысты. Ӕмӕ ӕцӕг афтӕ рауад. Павел Кесарийы ахӕстоны дыууӕ азы куы фӕци, уӕд ӕй акодтой Роммӕ, цӕмӕй Ромы хицау кесӕры раз дзуапп радтаид. Цӕй ӕмӕ базонӕм, Павелыл Роммӕ фӕндагыл цы ’рцыд, уый.