111 yachachiy

Juk wayna puñurpan

¡WAY, qhawariy! ¿Imanakurqataq kay waynari? ¿Imaraykutaq pampapi chuqakuchkanri? Qhawariy, chay wasimanta Pablopis lluqsimuchkan. Timoteopis chaypi kachkan. ¿Ventanamantachu kay wayna urmaykamunman karqa?

Ari, ventanamanta urmaykamurqa. Pabloqa Troas llaqtapi discipulosman yachachichkarqa. Pabloqa qʼayantin barcopi unayta ripunan karqa, chayrayku payqa khuskan tutakama hermanosta sunquchachkarqa.

Kay waynaqa Eutico sutikurqa, ventanapi chukuchkaptin puñukapusqa. ¡Kimsa kaq alto wasimanta ventananta urmaykamurqa! Chayrayku runaqa phutisqa kachkarqa. Ichapis wañurpan nispa, uqharimurqanku. Jinataq karqa, chay waynaqa wañurpasqa.

Pablo chay waynata wañusqata rikuspa, paypa patanman kʼumuykukurqa, marqʼarikuspataq nirqa: ‘Ama llakikuychikchu. ¡Payqa waliqlla kachkan!’, nispa. Jinataq karqa. ¡Pablo chay waynata kawsarichimurqa! Chaypi kaqkunaqa, maytapuni kusikurqanku.

Tukuy watiqmanta wasiman yaykuspa, mikhurqanku. Pabloqa sutʼiyanankama paykunawan parlarqa. ¡Euticoqa manacha juktawan puñurparirqachu! Chanta, Pablo, Timoteo, paykunawan kaqkuna ima barcoman wicharispa ripurqanku. ¿Maymantaq ripuchkarqanku?

Pablo kimsa kutita karu llaqtasman willamuq risqanta, tukuchkarqaña. Kay risqanpi Éfeso llaqtallapi kimsa watata qhipakurqa, chayrayku kay risqanqa astawan unay karqa, ñawpa risqanmantaqa.

Troasmanta lluqsispa, barcoqa Miletopi qhipakurqa. Éfeso manaña karupichu kasqanrayku, Pabloqa Efesomanta kuraq kaqkunata Miletoman jamunankuta nirqa. Chaypitaq, paykunawan chay kutillataña parlarqa. Efesomanta kaqkunaqa Pablo barcopi ripuchkasqanta riskuspa, mayta llakikurqanku.

Chaymanta Cesareaman chayaytawan, Pablo discípulo Felipep wasinpi qhipakurqa. Chaypi profeta Agaboqa, Jerusalenman riptiyki wisqʼaykusunqanku nispa Pablota willarqa. Ágabo nisqanmanjina, Jerusalenpi Pablota wisqʼarqanku. Romanokuna Cesareapi iskay watata wisqʼaytawan, Pablota Romaman kacharqanku, chaypi Romamanta kamachiq César juzgananpaq. Romaman apachkaptinku, imachus kasqanta qhawarina.

Hechos, 19 tʼaqamanta 26 tʼaqakama.