HAYI! HAYI! Koye mayi maikkinokka? Uulla uwe noo beetti lowo geeshsha gaˈninokka? Kuneeti lai! Mininni daanni noo manni ledo noohu Phaawuloosiiti! Ledosi nooha Ximootewosi laitto? Beettu maskootete aaninni uwinokka?

Ee, maskootete aaninni uwino. Phaawuloosi koye Xiroaadaho rosaanote qaale kulanni no. Isi layinki barra yowolotenni wole bayichcho haˈrara kaino daafira, tenne rosaanonni xaadikki lowo yanna keeshshannota afino. Konni daafira qaale kulanni hashshu taalooti geeshsha keeshshi.

Awuxekiisi yinannihu kuni beetti hakkawote maskootete ofolle no; hakko heeˈreenna goxichchu amadisi. Hakkiinnino maskootete aaninni sayikki fooqenni uullara uwi! Mannu lowo geeshsha masinohu iseraati. Mannu beetto uwinowiinni kayisanno wote, coyi insa waajjitu gede ikkino. Beettu reyino!

Phaawuloosi beettu reyinota afiti, aanaho barxa yee hanqafisi. Hakkiinnino, ‘Lubbote noona massinoonte!’ yii. Beettuno fayyo ikki! Tini maalalete! Phaawuloosi konne beetto reyotenni kayisino! Konni daafira mannu baalunku lowo geeshsha hagiidhi.

Hakkiinnino baalunku galagalte fooqete iimira hadhe sagale ittu. Phaawuloosi xaano qaale kulanni sooda geeshsha keeshshi. Ikkollana Awuxekiisi galagale digoxino yite huluullamittokki coyiˈra dandaatto! Hakkiinnino Phaawuloosi, Ximootewosinna ledonsa hadhannori yowolo gidditu. Insa hiikka hadharaatiro afootto?

Phaawuloosi sayikkita farciˈrote haˈrinshosi gudanni no; xa gobbasi higanni no. Tenne haˈrinshosira Efesooni katamira calla sase diro heeˈrino. Konni daafira tini haˈrinshosi layinkitenni roore suwashshotenna seedate.

Insa gidditino yowolo Xiroaadanni kaˈe Miliixini iillituti, hakko shiima yanna fooliishshidhu. Efesooni katami hakkiira mule ikkino daafira, Phaawuloosi Efesooni songo cimeeyye Miliixini daggara woshshi. Hakkono insa ledo goofimarchu hasaawa hasaawi. Hakkunni gedensaanni yowolo hadhanno yanna iilliteenna, Phaawuloosi haˈrara kaita, cimeeyye lowo geeshsha dadillitu!

Gedensaannino yowolo Qeesaariya iillitu. Phaawuloosi hakkiichcho rosaanchu Filiphphoosi mine heeˈreenna, Agaboosi yinanni masaalaanchi Phaawuloosi qorophphi yiisi. Kuni masaalaanchi Phaawuloosi Yerusaalame mariro usuramanno yii. Hakkiinnino isi yiinori ikki. Phaawuloosi lame diro Qeesaariyaho usurami. Hakkunni gedensaanni, Roomu gashshaanchi Qeesaari isira firde aanno gede Rooma sonkisi. Rooma haˈranna doogote ikkinore hanni laˈno.