111-нҗи хекая

Бир огланың ука гидиши

ВАХ! Бу ерде нәме болдука? Оглан нәме үчин ерде ятырка? Бир ерини агыртдымыка? Серет, Павлус адамлар билен өйден ылгап чыкяр! Оларың арасында Тимотеосы гөрйәңми? Оглан пенҗиреден йыкылайдымыка?

Хава, ол пенҗиреден йыкылды. Павлус Троасдакы шәгиртлер билен гүррүң эдип отырды. Ол шәгиртлери көп вагтлап гөрмеҗегини билйәрди, себәби эртеси гүн гәмә мүнүп, ёла дүшмелиди. Шонуң үчин олар билен ярыгиҗә ченли гүррүң гечирди.

Эфтихос атлы оглан болса, пенҗиреде отырды. Йөне ол бирден ука гитди. Бейлеки тарапына өврүлҗек боланда, җайың үчүнҗи гатындан ашак гачды! Ине, шонуң үчин хем адамлар гаты горкдулар. Огланы галдырып гөрселер, ол өлен экен!

Павлус огланың өлендигини гөрүп, оны гуҗаклаяр. Соңра адамлары көшешдирип: «Алада этмәң. Ол дири!» диййәр. Хакыкатдан-да, ол дири! Гудрат болды! Павлус оны дирелтди! Муңа хеммелер бегенди.

Соңра хеммелер өе гирип, агшам нахарыны ийдилер. Павлус болса гүн догянча олар билен гүррүң этди. Эфтихосың инди укусы тутанок! Шондан соң Павлус, Тимотеос ве ёлдашлары гәмә мүнүп уграярлар. Оларың нирә гиденини билйәңми?

Шейдип, Павлусың үчүнҗи сыяхаты гутаряр. Ол инди өйүне гайдып баряр. Ол Эфесосың өзүнде үч йыл болды. Шонуң үчин онуң бу сыяхаты икинҗи сыяхатындан хас-да узага чекди.

Гәми Троасдан чыкып, Милитосда бираз сакланды. Эфесос шәхери бары-ёгы бирнәче километр узаклыкдады. Павлус шол шәхериң яшулулары билен соңкы сапар гүрлешмек үчин олары Милитоса чагыряр. Мундан соң, Павлус гәмә мүнүп гитмелиди. Олар муңа гаты гынандылар!

Ахыры гәми Кайсария гелйәр. Павлус Филипус диен шәгирдиң өйүнде яшаяр. Шол ере Агабус атлы пыгамбер гелйәр. Ол Павлусың Иерусалимде түрмә басылҗагыны айдяр. Онуң айдышы ялы хем боляр. Кайсарияда ики йыл түрмеде отурандан соң, Павлусы Риме гечирйәрлер. Шол ерде оны Рим хөкүмдары суд этмелиди. Гел, ёлда нәме боланыны билели.

Ресулларың ишлери 19—26-нҗы баплар.