Makani 111: Mwana Musankwa Iwakoona
MAAWE! MAAWE! Ncinzi cicitika aawa? Hena walicisa kapati mwana ooyu uulede ansi aawa? Langa! umwi uuboola abantu aaba ngu Paulu. Hena wamubona awalo Timoti aalya? Hena mwana waloka kuzwa ampulungwido?
Inzya. Paulu wali kwaambaula makani kuli basikwiiya muno mu Tilowasi. Ulizyi kuti ciya kutola ciindi cilamfwu kuti babonane alimwi, nkaambo bwaca buyo weelede kuti anyamuke abwato kaya bweenda. Aboobo wali kwaambaula kusikila akati kamasiku.
Ooyu mwana wazina lya Utiko walikkede ampulungwido, kumane woona. Waloka kuzwa ampulungwido yaŋanda yatatu kuya mujulu. Aboobo ulakonzya kubona bantu ncobatakkomenyi. Bantu nibamubweza mwana, baliyoowede kapati kabayeeya kuti ulifwide!
Paulu abone kuti mwana wafwa, woona ali nguwe wamufwukatila. Kumane wati: ‘Mutapengi. Uuli buyo kabotu!’ Ngooyu we! Aaya maleele! Paulu wamubusya mwana. Boonse bantu bakkomana kapati.
Boonse bajokela alimwi muŋanda yamujulu baakulya. Paulu uluujisi kwaambaula kusikila bwaca. Pele ulakonzya kuba masimpe kuti Utiko tana wona alimwi. Kumane Paulu, Timoti abaabo mbocuunka limwi bakkwela bwato. Hena ulikuzyi nkobaya?
Paulu naamanizya lweendo lwakwe lwatatu lwakukambauka, lino uli munzila kujokela nkwazwa. Mulweendo oolu Paulu wakakkala alikke kwamyaka yotatwe mumunzi wa Efeso. Aboobo oolu ndweendo lulamfwu kwiinda lwabili.
Azwe mu Tilowasi, bwato bwaima mu Melito kwakaindi kaniini. Mbwaanga lweendo lwaku Efeso ndwamakkilomita buyo masyoonto kuzwa waawo Paulu mpabede, Paulu waambila bapati bamumbungano kuboola ku Melito kutegwa aambaule ambabo ciindi camamanino. Nicasika ciindi cakuti bwato bunyamuke, elo cabacima bantu kubona Paulu nkwaunka!
Alimwi bwato bwajokela ku Kaisaleya. Paulu kacikkede ano aŋanda yasikwiiya Filipo, musinsimi Agabo wamucenjezya Paulu. Wati uya kuba sintolongo wakuunka ku Jelusalemu. Alimwi oobo mbocacitika. Eelyo akkale muntolongo kwamyaka yobilo mu Kaisaleya, Paulu wakatolwa ku Loma kuti akabetekwe kumuleli wa Loma wazina lya Kaisala. Atubone cacitika mulweendo lwaku Loma.
Milimo caandaano 19 kusikila ku 26.
Mibuzyo
- Ngwani mwana acifwanikiso uulede ansi, alimwi ncinzi cacitika kuli nguwe?
- Ncinzi Paulu ncaacita naabona kuti mwana wafwa?
- Ino nkuli nkobaya ba Paulu a Timoti alimwi abaabo mbocili limwi, alimwi ncinzi cacitika nobaima a Melita?
- Ncinzi musinsimi Agabo ncaamucenjezya Paulu, alimwi mbuti mbocacitika kweelana ambwaamba musinsimi?
Mibuzyo aimwi
- Bala Incito 20:7-38.
Mbuti mbotukonzya ‘kusalala kubulowa bwabantu,’ kweelana amajwi aa Paulu aalembedwe ku Incito 20:26, 27? (Ezk. 33:8; Inc. 18:6, 7)
Nkaambo nzi baalu ncobeelede ‘kujatisya majwi meni-meni’ nobayiisya? (Inc. 20:17, 29, 30; Tit. 1:7-9; 2 Timo. 1:13)
- Bala Incito 26:24-32.
Mbuti Paulu mbwaakabelesya kuba mwana wacisi wa Loma mukuzuzikizya mulimo wakukambauka ngwaakapegwa kuli Jesu? (Inc. 9:15; 16:37, 38; 25:11, 12; 26:32; Lk. 21:12, 13)
