¡AY KʼELA ja jasa ekʼeli! ¡Kʼela ja ala yal kerem tey jawan bʼa luʼumi! ¡Jel maʼ yajbʼel kanel! ¿Ja wilata ja winik maʼ bʼajtan elumjan ja bʼa naʼitsi? Jaʼa Pablo. ¿Wan maʼ xbʼobʼ awil chomajkil ja Timoteo tey smoka? ¿Yuj amaʼ ti mokʼ kon bʼa bentana ja ala yal keremi?

Jaʼi, jachʼni ekʼtaʼa. Ja Pablo wan yajel ekʼuk ajyi jun sloʼil sbʼaja nebʼumanik bʼa chonabʼ Troasi. Ja yeʼn wani snaʼa mixa oj ajyuk smoke jitsan tyempo yujni x-ela kʼaʼuji ojxa wajuk bʼa jun barko. Ja yuj kan yaʼ ja sloʼili man nalan akʼwal.

Pes ja keremi, sbʼiʼil Eutico, tey kulan ajyi bʼa jun bentana man yoxil kaje ja bʼa naʼitsi, och swayel sok ti mokʼ kona. Ja yuj wa xbʼobʼ awil ja ixuk winiki jel chamkʼujol aye. Yajni ja winike sjachawe ja yal keremi, jani ekʼel ja jas jel wa xcham skʼujoleʼi. ¡Ja yal keremi chamel xa!

Yajni ja Pablo yila ja yal keremi chamel xa, ti koʼ mekʼan sbʼaja sok ti stelaʼa. Anto ti yalaʼa: «Mok chamuk akʼujolex. ¡Ja yeʼn lek ay!». Merani ja jas yala ja Pablo, ¡ya sakʼwuk ja yal keremi! ¡Jun jasunuk jel chamyiljel! Ja ixuk winiki jel gustoʼaxiye juntiro.

Anto ti ochye och pilan ekʼele ja bʼa yoj naʼitsi sok ajyiyujile jun swaʼele. Ja Pablo snocho yi ja sloʼili man sakbʼi. ¡Ja ekʼele it ja Eutico mixa ni oj och swayela! Anto ja Pablo, ja Timoteo soka matik ay smokeʼi kʼeye ja bʼa barko. ¿Wan maʼ xa naʼa bʼa oj wajukeʼa?

Ja Pablo chʼakum xa ja yoxil najat sbʼejyel bʼa xcholjeli. Kechanta ja bʼa chonabʼ Éfeso ajyi oxe jabʼil. Ja yuj, mas albʼel ja najat sbʼejyel it yuja xchabʼili.

Tsaʼan ja elta bʼa Troasi, ja barko ti kʼot tekʼan chabʼ oxeta kʼakʼu bʼa Mileto. Ja chonabʼ Éfeso wa xkan jun 50 kilometro bʼa Mileto, ja yuj ja Pablo sjeka spayjel ja winike matik ayxa skʼujole bʼa kongregasyon bʼa Éfeso ajakuke man Mileto bʼa oj skʼumkani. Tsaʼan yajni yilawe wajum xa ja barko bʼa wajum ja Pablo, ¡jel triste kanye!

Ja Pablo tixa kumxi bʼa Cesarea. Malan ja yeʼn ti kanel bʼa snaj ja nebʼuman Felipe, ja aluman Ágabo ya snaʼ ja Pablo oj chʼikjuk preso yajni xkʼot ja bʼa Jerusaleni. Jani jaw ja jas ekʼi, jastal yala ja Ágabo. Ja Pablo ti ajyi lutan chabʼ jabʼil bʼa Cesarea, tixa jekji bʼa Roma bʼa oj chapjuk jas oj kʼulajuk yi yuja César, ja mandaranum bʼa Roma. La kiltik jasa ekʼ ja wajume bʼa Roma.