AIYO! Wanem samting i kamap? Dispela yangpela man i slip long graun, em i bagarap olgeta o olsem wanem? Lukim! Dispela man i ran i kam em Pol! Yu inap lukim Timoti? Olsem wanem? Yangpela man hia i pundaun long windo?

Yes, em i bin pundaun long windo. Pol i mekim wanpela tok long ol disaipel hia long Troas. Em i save em i no inap lukim ol moa inap longpela taim, long wanem, long neks de em bai kalap long sip na i go. Olsem na em i pulim tok i go inap biknait.

Dispela yangpela man, nem bilong em Yutikus, em i sindaun long windo na em i slip. Em i stap long namba tri plua antap na em i pundaun i go daun! Olsem na yu inap save bilong wanem pes bilong ol manmeri i soim olsem ol i bel hevi tru. Taim ol man i apim em, ol i lukim olsem em i dai pinis!

Taim Pol i lukim olsem dispela mangi i dai pinis, em i slip antap long em na holim em. Em i tok: ‘Yupela i no ken bel hevi. Em i stap laip!’ Na tru tumas, em i stap laip! Em wanpela mirakel! Pol i kirapim bek dispela yangpela man! Olgeta manmeri i amamas tru.

Olgeta i go bek long rum antap na ol i kaikai. Pol i pulim tok i go inap tulait. Tasol nau yu ken save olsem Yutikus i no slip, em i putim gut yau i stap! Orait, nau Pol na Timoti na ol wanwok bilong tupela ol i kalap long sip. Yu save ol i laik i go we?

Nau Pol i pinisim namba tri raun bilong em long autim tok, na em i laik i go bek long ples. Long dispela raun Pol i bin i stap tripela yia long Efesus. Dispela raun i bikpela moa winim namba tu raun bilong em.

Sip i lusim Troas na i go stap liklik taim long Miletus. Efesus i stap klostu tasol long Miletus, olsem na Pol i singautim ol elda bilong kongrigesen bilong Efesus i kam na bai em inap givim laspela tok long ol. Taim sip i redi long i go, ol i sori tru long Pol i lusim ol!

Bihain sip i kamap long Sisaria. Pol i stap long haus bilong disaipel Filip, na profet Agabus i kam givim tok lukaut long em. Em i tok ol bai kalabusim Pol taim em i go long Jerusalem. Na tru tumas, ol i mekim olsem. Pol i kalabus inap tupela yia long Sisaria, na bihain ol i salim em i go long Rom na bai em i kot long ai bilong Sisar. Orait yumi ken stori nau long ol samting i painim em taim em i stap long sip bilong i go long Rom.