ОЙТ! Мында чүү болган? Чүге бо оол черде чыдыр — ол чаза үзүпкени ол бе? Көрем — бажыңдан өске улус-биле кады Павел үне халып келди! Оларның аразында Тимофе́йни база көрүп тур сен бе? Таанда, бо оол соңгадан кээп дүшкени ол бе?

Ол шак-ла ынчаар болган. Павел маңаа, Троа́дага, өөреникчилер-биле чугаалажып турган. Олар-биле ужуражыры талыгыр деп ол билир турган, чүге дээрге даарта корабльге олурупкаш, чоруур ужурлуг турган. Ынчангаш олар-биле дүн ортузунга чедир чугаалашкан.

А Евтих, ол оолдуң ады-дыр, соңга караанга олургаш, удуй берген. Ол согаңнааш, үшкү каъттың соңгазындан аңдарлып кээп дүшкен — мырыңай черже! Чүге кижилер ынчаар корга бергени, ам сеңээ билдингир. Оолдуң бажын ковайтыпкаш, оларның эң-не коргуп турган чүвези болу бергенин көрүп каан. Ол өлген!

Ынчан Павел ооң кырынче чыдып алгаш, куспактапкан. Ооң соонда кижилерни оожургадып турар: ‘Дүвүревеңер. Ооң-биле шупту чүве эки!’ Ол шынап ындыг! Хуулгаазын болган! Павел ону диргизипкен! Шупту улус хөлчок өөрүп турар.

Олар шупту бажыңче киргеш, кежээки чем чип турар. А Павел даң адып келгиже чедир чугаалажып турар. Евтих ам удуур хире эвес деп, билип турар боор сен! Ооң соонда Павел, Тимофе́й база оларның өске-даа өөрлери корабльче олурупкан. Олар ам кайнаар баарын, билир сен бе?

Ам чаа Павелдиң үшкү миссионер аян-чоруу доозулган, ынчангаш ол чанып бар чыдар. Бодунуң аян-чоруунуң үезинде Павел чүгле Эфе́ске үш чыл болган. Ынчангаш ол аян-чорук ийиги аян-чоруктан элээн үр болган.

Троа́дадан чоруткаш, корабль Миле́тке үр эвес турупкан. Моон тура чүгле каш километрде Эфе́с турар боорга, Павел Эфе́с хуралының удуртукчуларын Миле́тче оларның-биле сөөлгү катап чугаалажыр дээш келирин дилээн. Чарлыр шак кээрге, олар кайы-хире муңгараан дээр ону!

Ам-на корабль Кесарияга чедип келген. Павел Фили́пп деп өөреникчиниң бажыңында турда, Агав медээчи аңаа дыңнадып турар. Павелди Иерусали́мде кара-бажыңга олуртуп каар деп, ол баш бурунгаар чугаалаан. Шак ынчаар болган. Кесарияга кара-бажыңга ийи чыл олурган соонда, Павелди Римче Римниң башкарыкчызы це́зарьның шииткели-биле шиидер дээш чорудупкан. Рим оруунга чүү болганыл, билип алыылам.