Tantara 111

Tsaiky Araiky Latsaka

MISY nino ma iô? Tsy naratra mare edy tsaiky io va? Paoly miaraka amin’olo aby miboaka io. Hitanao koa Timoty? Tsaiky io ma latsaka boaka tan̈abo lafenaitara?

Ia. Tamin’andra io, Paoly nan̈azava raha tamy mpianatra aby ta Troasy. Hainy fa tsy hahita irô eky izy, fôtony izy handeha sambo kiakin’izin̈y. Ke izy nan̈azava raha ziska sasak’alin̈y.

Eotyka an̈aran̈a tsaiky io. Tamy Paoly nan̈azava in̈y, izy nipetraka tamy lafenaitara. Izy baka tiô nirôzin̈y. Tiô fo, izy latsaka boaka tamin’etazy fahatelo tarỳ. Ke zen̈y nampasahiran̈a olo aby io. Irô koa fa nibata tsaiky io, raha nidaon̈an-drô edy niboaka. Tsaiky io naty!

Paoly koa fa nahita tsaiky io naty, izy nandrinandry tan̈abony tiô, baka iô nitolon̈iny tsaiky io. Volan̈iny: ‘Kaza miasa loha, fa izy tsara fo!’ Zen̈y ankitin̈y raha niboaka. Tsaiky io velon̈o! Fahagagan̈a zen̈y! Paoly nahavita namelon̈o tsaiky io! Olo jiaby ravoravo.

Irô jiaby nimpody tan̈abo etazy tan̈y, nihinan̈a. Paoly mbala nan̈azava fo zisk’andra kiaka. Eotyka tamin’io tsy tafandry eky e! Paoly amy zay niaraka tamy Timoty ndreky mpianatra sasany nandeha sambo. Handeha aia ma irô?

Fahatelon’ny diabe nataon’i Paoly tamin’io, izy hody an-tran̈onany. Tamy dianany io, Paoly nidôko ta Efesosy, tan̈atin’ny telo taon̈o. Nahadin̈y izy tamy diany araiky ty.

Irô koa fa niala Troasy, sambo ningoan-drô in̈y nidôko hely ta Mileto. Paoly nikaiky anti-pan̈ahy tamy fiangonan̈a Efesosy handeha Mileto, tanàna tsy lavitry iô, hitandren̈y fan̈azavan̈a nataony farany. Izy baka fa tsy impody an̈y eky! Sambo koa fa handeha, irô nalahelo, nahita Paoly lôso!

Sambo in̈y koa fa navy ta Kaisaria, Paoly nitoby tan-tran̈on’i Filipo mpianatra. Agabo mpaminan̈y nampitandrin̈y Paoly. Volan̈iny fa Paoly koa avy Jerosalema an̈y, higadra. Marin̈y ankitin̈y raha nivolan̈iny! Paoly koa fa nigadra taon̈o aroe ta Kaisaria, izy nalefan-drô ta Roma. Farany Kaisara mpanapaka romanin̈y nitsara izy. Alô atsika hizaha nan̈ano karakôry diany ta Roma zen̈y.

Asan’ny Apostoly toko faha-19 ziska toko faha-26.