OO! O! Cici cacikutendekwa pelepa? Ana mcanda jwagonile pasijo alipwetece mnope? Alole! Jumo mwa ŵandu ŵakukopoka m’nyumbamo ali Paulo! Ana akum’wona Timoteyo pelepo? Ana mcandajo agwile kutyocela pa liwindopo?

Elo, yayitendekwe ni yeleyo. Paulo ŵaŵecetaga ngani kwa ŵakumkuya Yesu, akuno ku Tulowa. Jwalakwe ŵamanyililaga kuti ngasiŵawonasoni kwa ndaŵi jelewu ligongo ŵasosekwaga kutyoka pa liboti lisiku lyakuyicisya. M’yoyo ŵajendelecele kuŵeceta mpaka sikati ja cilo.

Sambano mcandaju, juŵaliji lina lyakwe Yutiko ŵatemi paliwindopo, kaneko ŵatandite kugona. Ni jwalakwe ŵagwilile pasi kutyocela paliwindo lya nyumba jatatu jesajikanye! M’yoyo ni ligongo lyakwe akwawona ŵanduwo kuti akuwoneka ŵakudandawula. Ŵanduwo pakumnyakula mcandajo, akum’wona kuti awile mpela muŵaganicisyaga!

Paulo pakuyiwona kuti mcanda jula awile, akulijala pacanya pa mcandajo, nikumkumbatila. Kaneko akuŵeceta kuti: ‘Akadandawula. Ali cenene! Soni yili yisyene! Yili yakusimonjesya! Paulo amjimwisye ku ŵawe mcanda jula! Likuga lya ŵandu ŵala likusangalala mnope.

Kaneko wosope akwawulasoni kunyumba japenani jila kukulya cakulya. Paulo akwendelecela kuŵeceta mpaka kuca. Yutiko ngakugonasoni! Kaneko Paulo, Timoteyo, soni ŵane ŵaŵajendaga nawo akwawula kukukwela liboti. Ana akumanyilila kwakwawula?

Paulo akwamba kumalisya kwene ulendo wakwe watatu wakulalicila, sambano akwawula kumangwakwe. Paulendowu, Paulo atemi yaka yitatu ku msinda wa Efesope. M’yoyo awuno uli ulendo welewu mnope kupundana ni waŵili wula.

Ali atyosile ku Tulowa, liboti likwima ku Mileto kwakandaŵi kamnomno. Pakuŵa msinda wa Efeso wuli pakuŵandika, Paulo akwatumisya ŵandu kuti akaŵilanje acakulungwa ŵa mumpingo kuti ayice ku Mileto kuti aŵecetane nawo kakumalisya. Kaneko pajakwanile ndaŵi jakuti liboti linyakuce, acakulungwaŵa ali ŵakudandawula kum’wona Paulo ali mkwawula!

Kumbesi kwakwe liboti likukopocelasoni ku Kaisaleya. Paulo pakutama akuno kunyumba ja Filipi, jwakumkuya Yesu, jwakulocesya Agabu akumkalamusya Paulo. Jwalakwe akuŵeceta kuti Paulo cacimkamula ukayidi pakwawula ku Yelusalemu. Soni yeleyi, ni yayikutendekwa. Kaneko pambesi pakutama m’nyumba ja ukayidi kwa yaka yiŵili ku Kaisaleya, akumtumisya Paulo ku Loma kuti akajanje magambo pameso pa jwakulamulila jwa Ciloma Kayisala. Kwende tulole yayikutendekwa paulendo wakwawula ku Loma.