AN NIAN! Sa w’a ɲan mmeli nga nunfuɛ mun! Mmeli’n su bubu! ?Amun wun sran nga b’a tɔ nzue nun lɛ’n? Be wie’m b’a kwla kpɛn cenje’n su wa. ?Pɔlu o be nun wie? Amun e nian sa nga ɔ juli i su’n.

Nán amun wla fi su kɛ Pɔlu dili afuɛ nɲɔn bisua’n nun Sezare lɔ. Kɛ ɔ yoli sɔ’n, be fali Pɔlu nin bisuafuɛ wie mun wlali mmeli kun nun naan bé fá be kɔ́ Rɔmu. Kɛ bé sín Krɛti mɛn’n mɔ nzue sin yiɛ i’n i wun lɛ’n, seke dan wie wa tɔli be su. Aunmuan sɔ’n m’ɔ fita dan’n ti’n maan be nga be kan mmeli’n be kwlaman like fi yo. Be kwlá wunman wia’n annzɛ nzraama mun kɔnguɛ. Ɔ maan i agualiɛ su’n, kɛ be dili cɛn wie mun mmeli’n nun’n, be wie fi be lafiman su kun kɛ bé kwlá fíte nun.

Kpɛkun Pɔlu jaso seli kɛ: ‘Amun nun wie fi su wuman, saan mmeli’n i kunngba cɛ yɛ ɔ́ sáci ɔ. Andɛ kɔnguɛ Ɲanmiɛn i anzi kun bali min wun yɛ ɔ seli min kɛ: “Nán srɛ kun ɔ Pɔlu! Saan á jú Sezali ja su lɔ. Yɛ Ɲanmiɛn wá dé be nga a nin be o mmeli’n nun’n be kwlaa.”’

Kɛ aunmuan dan sɔ’n sinnin’n, i cɛn ba blu nin nnan su, kɔnguɛ afiɛn’n, be nga be o mmeli’n nun’n be bu i kɛ be su wa to asiɛ wie! Kɛ srɛ kun be mɔ be bu i kɛ bé wá fú yɛbuɛ wie su ti’n, be toli mmeli’n i blalɛ nnan mɔ be fa jrɛn i’n guali nzue nun. Kɛ i lika cɛnnin’n be wunnin asiɛ wie. Be waan bé fá mmeli’n lele bé fá jú cenje’n su lɔ’n.

Kɛ bé mántan asiɛ’n i wun koko lɔ’n, mmeli’n mlɔnnin aunɲan nun. Jenvie’n m’ɔ bo gua mmeli’n su kekle’n ti’n, mmeli’n bubuli. Sonja su kpɛn’n seli kɛ: ‘Be nga be si nzue wɛ’n, maan be dun mmua tɔ nzue nun wɔ cenje’n su lɔ, yɛ be onga’n be uti waka bue nin mmeli buebue’m naan mmeli’n fa be wɔ.’ I sɔ yɛ be niannin su be yoli ɔ. Kɛ be yoli sɔ’n maan sran ya nɲɔn ableso nin nsiɛn (276) nga be o mmeli’n nun’n, be kwlaa be fiteli nun kɛ nga anzi’n fa kannin’n sa.

Mɛn nga nzue sin yiɛ i mɔ be fiteli su’n, be flɛ i kɛ Malti. Lɛfuɛ’m be klun ti ufue kpa, be niannin be kwlaa nga be fin mmeli’n nun lɔ fiteli’n be lika. Kɛ lika’n wa yoli kpa’n, be fali Pɔlu wlɛli i mmeli uflɛ kun nun ɔli Rɔmu.