BUSHE naumona icilecitika ku bwato? Bulepandauka! Bushe naubamona abantu abatolokele mu menshi? Bamo, nabafika na ku mulundu. Umwaume umo pali aba ni Paulo. Natumone icacitike kuli ena.

Nga uleibukisha, Paulo balimukakile mu cifungo, mu Kaisarea pa myaka ibili. Lyena ena nabo ali nabo mu cifungo babaninike mu bwato no kubatwala ku Roma. Ilyo bapitile pa cishi ca Krete, kwaishile icipuupu ca mwela icibi. Icimwela calikulile sana ica kuti na baume abale-ensha ubwato balefilwa no kwensha. Akasuba kalilekele ukumoneka e lyo ne ntanda tashalemoneka ubushiku. Na pa numa ya nshiku ishingi, abalimo bonse bamwene fye kwati balafwa.

Lyena Paulo abebele ati: ‘Mwisakamana, Takuli nangu umo uwalafwa, ubwato fye e bwalaonaika. Pantu ubushiku malaika acinjeba ati: “Witiina Paulo! Ufwile ukuyaiminina pa ntanshi ya kwa Kaisare, kateka wa bena Roma. Kabili Lesa alemupususha bonse.”’

Ubushiku pa kati, pa bushiku bwalenga 14 ukutula apo icimwela catendekele, abali mu bwato balimwene ukuti amenshi yalitendeke ukucepa! Bafumishe inanga ku bwato pantu baletiina ati nalimo kuti bayayuma ku fimabwe pantu kwalifiitile. Ilyo bwacele, umulundu walimoneke. Baeseshe ukooba ubwato ukuya ku mulundu.

Ilyo bapalamine ku mulundu, ubwato bwaileiminina pa mucanga. Amabimbi yatendeke ukuuma ku bwato, kabili ubwato bwatendeke no kupandauka. Umukalamba wa bashillika atile: ‘Bonse mwe bengasamba insamfi, balilenipo ukuya ku mulundu. Mwe bashala mukonke abanenu, kabili mwikate ku fipimfya fya bwato.’ Kabili ifi fine, e fyo bacitile. Nga fintu malaika alandile, abantu bonse 276 abali mu bwato balifikile fye bwino pa cishi.

Ici cishi, balecita abati Melita. Abantu abalipo bali bwino kabili balisungile bwino abafumine mu bwato. Ilyo umwela walekele ukupuupa, Paulo bamuninike mu bwato bumbi ubwaleya ku Roma.