TALA! ulungu uli mu kapinda! Unapaluka mu yihanda! Yena unamono atu waze alikonga mu meya? Amwe haheta kusesa lia Kalunga-lwiji. Shina au uli aha kali Paulu? Tutalenu yize yinakapwa kuli ayo.

Euluka ngwo, Paulu kanakalinga miaka yaali mu ufunge ku Sezarea. Kuzekwene iye ni funge akwo yaanjisa mu umwe ulungu, hanga aye no ku Roma. Muze ayo te anapalika hakamwihi ni tungu lia Kreta, umwe kangonga munene yaapinjisa. Fuji yacho te yili ni tachi jinji, kashika malunga wano te kaso kuhasa kwendesa ulungu. Ayo nawa ha mwalwa te kaso kumona tangwa chipwe tutongonoshi ha ufuku. Hi hakupalika cha matangwa anji, ayo te keshi nawa ni ufulielo ngwo mapwa ni ulamwino.

Mba Paulu yamba ngwenyi: ‘Niumwe wa kuli yenwe mwono wenyi muutoka wakwihi, ulungu wika we muutoka. Ufuku uze wapalikanga umwe mungelo wa Zambi kezanga kuli yami yamba ngwenyi, “Kanda wivwa woma Paulu! Yena chakutamba kumana kulutwe lia nguvulu wa Roma Sesare. Nawa Zambi malamwina atu eswe waze analinga wenyi hamwe ni yena.”’

Ha muchima ufuku, ha 14 a matangwa, muze te kangonga kanda achiputuka, akwa kwendesa ulungu yamona ngwo meya hahuwa! Kashika ayo yaholola ankora mu meya, hanga ha ufuku achine kupupa ku mawe. Ha chimene mba ayo yamona yimwe ngenge. Hi ayo yeseka kutwala ulungu kusesa lia meya.

Mba, muze ayo te haheta hakamwihi ni ngenge, ulungu yiulipupa ku umwe mulundu wa mavu yiusakaminya hohene. Mba hi mikanya ya meya yiputuka kupalula ulungu mu yihanda. Kapitau wa chilombo cha maswalale yamba ngwenyi: ‘Eswe waze ananyingika kusana atumbuke chitangu mu kalunga-lwiji hanga asane ndo ku ngenge. Kusuloho akwo mahasa kutumbuka hanga akwate ku amwe mapaya a ulungu.’ Chenacho che ayo anakalinga. Mba atu eswe 276 waze apwile mu ulungu yaalamwina, ngwe chize mungelo anakalakenya.

Tungu liacho kakulivuluka ngwo Melita. Atu jamo te kakwete umbovu unji, nawa ayo yafunga atu waze apwile mu kapinda wa ulungu. Muze mashimbu te hapwa apema, mba Paulu yaya nenyi ku Roma mu ulungu weka.