GET sa bato i dan difikilte! I pe kas an morso! Eski ou vwar bann dimoun ki’n sot dan delo? Detrwa in deza ariv ater. Eski Pol ki la? Annou vwar ki’n arive avek li.

Mazinen, ki pour de zan Pol ti dan prizon Sezare. Apre, li ek detrwa lezot prizonnyen ti ganny mete lo en bato, e zot ti al Ronm. Kan zot ti pas pre avek zil Kret, en tanpet ti tap zot. Divan ti pe soufle sitan for ki sa bann zonm pa ti kapab kondwir bato. E zot pa ti kapab vwar soley pandan lazournen oubyen zetwal aswar. Finalman, apre plizyer zour, bann dimoun ki ti lo bato ti panse ki zot pa ti pou ganny sove.

Apre, Pol ti debout e dir: ‘Personn parmi zot pa pou perdi zot lavi; zis bato ki pou perdi. Pandan lannwit, en lanz Bondye ti vin kot mwan e dir, “Pa bezwen per, Pol! Fodre ki ou prezant devan Sezar, dirizan Romen. E Bondye pou sov sa bann dimoun ki pe navig avek ou.” ’

Apepre minwi katorzyenm swar, apre ki sa tanpet ti’n konmanse, bann maren ti remarke ki delo ti pe desann! Lefe ki zot ti per ki zot a tap avek bann ros dan fernwar, zot ti zet bann lank. Lannmen bomaten zot ti vwar en labe. Zot ti deside anmenn bato lo lans.

Kan zot ti ariv pre avek ater, bato ti tap en ban disab e i ti pri lanmenm. Apre laroul ti konmans kraz li, e bato ti konmans kas an morso. Sa zofisye larme ki ti ansarz ti dir: ‘Tou sa ki kapab naze sot dan delo premye, apre naze ziska ater. Lezot i devre swiv zot lo plans ek debri bato.’ E se sa ki zot ti fer. Dan sa fason tou sa 276 dimoun ki ti lo bato ti ariv ater sen e sof, zis parey lanz ti’n promet.

Sa zil ti apel Malt. Bann dimoun lo sa zil ti zantiy, e zot ti pran swen avek bann dimoun ki ti abor sa bato. Kan letan ti’n kalmi, Pol ti ganny mete lo en lot bato e ganny anmennen an Ronm.