RAICA! sa kasa tu oqori na waqa! Sa kakaseresere! O raici ira na sa rika i wai? E so era sa yaco i vanua. Oya beka o Paula? Meda raica mada na veika a sotava.

Nanuma tiko ni a vesu yabaki rua tu mai Sisaria o Paula. Sa qai vakavodoki i waqa kei na so tale na kaivesu mera sa kau i Roma. Dua na draki ca levu era donuya nira sa soko ravita na yanuyanu o Kiriti. E kaukaua sara na cagi qai dredre nira ulia na waqa na kaimua. Era sega ni raica rawa na matanisiga ena siga se na kalokalo ena bogi. Ni vaka toka oya me vica na siga, sa ra nanuma ga na vodo tiko e waqa nira na mate kece.

E tucake o Paula qai kaya: ‘Ena sega ni dua e mate; ena kasa ga na waqa. A kaya vei au na agilosi ni Kalou ena bogi: “Kua ni rere Paula! O na lai tu dina ga e mata i Sisa. Ia, na Kalou ena vakabulai ira tale ga na soko tiko vata kei iko.”’

Rauta na bogilevu, ena ika14 ni siga ni nodra soko tiko ena draki ca oya, sa ra vakila na kaimua ni sa vovodea na wai! Era ririko de tavutu na waqa ena vatu, ra biu ikelekele sara kina. Ena mataka, era sa raica e dua na toba. Era nanuma mera kauta na waqa me lai kasa ena kena baravi.

Ia nira sa voleka yani, sa kasa na waqa ena dua na delaniyamotu. Sa qai roba na waqa na ua, mani kakaseresere kina. Kaya sara na turaganivalu: ‘O kemuni kece na rawa ni qalo, ni qalo i vanua. Ni qai rika emuri na kena vo, mo ni kukube ena so na kau.’ Era muria na ivakaro oqori. Ra bula kece kina na 276 na lewe ni waqa, me vaka ga a yalataka na agilosi.

Era cabebula ena yanuyanu o Milito. Era yalovinaka na itaukei ni vanua oqo, ra qai qaravi ira na voca. Ni sa draki vinaka, sa qai vakavodoki o Paula ena dua tale na waqa me kau i Roma.