Oskepi ya tekere pekoverwahi
EHUNGI 112
Oskepi ya tekere pekoverwahi
TARA! Oskepi i ri moumba! Oyo mai teka moutupa! Ovandu mbe ri yumbu momeva mo ve munu? Tjiva va vaza rukuru komukuro. Ingo oPaulus ngu ma munika mbo? Indjeye tu konḓonone kutja ovikwaye mbyaavi tjitwa ku ye.
Zemburuka kutja oure wozombura mbari Paulus wa ri a ṱizirwa mondeko moSesarea. Okuzambo eye novakamburwa tjiva varwe va tuwa moskepi, nave twarewa koRoma. Indu owo tji va kapita popezu nekoverwahi raKrete, otjivepo otjizeu tje ve wira. Ombepo ya hinga tjinene ngandu ovarumendu tji va urirwe okuhinga oskepi. Nowo kaave yenene okumuna eyuva mutenya poo ozonyose mouṱuku. Korusenina, kombunda yomayuva omengi, imba mba ri moskepi ve rihahiza ave munu kutja mave ṱu.
Okuzambo Paulus wa sekama na tja: ‘Kape nomundu pu eṋe ngu ma ṱu, posi yoskepi porwayo ondji mai ṱomwine. Orondu ouṱuku mbwa zu ko omuengeli waMukuru we ere ku ami na tja, “O tira, Paulus! Ove mo sokukakurama komurungu wOmukesare waRoma. Nu Mukuru ma yama ovandu avehe mbe ri puna ove moskepi.”’
Ape mokati kouṱuku meyuva oritjamurongo na ine kombunda yotjivepo tji tja uta, ovarumendu ovaungure vomoskepi va uta okumuna kutja omeva maye ende amaye henduruka! Mena rokutja aave tira kutja oskepi ngaai ritono motuuwa indu tji kwa zorere, owo va pundisa ozongoorero zawo. Ependukirwa raindo owo va muna otjikuturiro tjozoskepi. Owo va tya okurora okuhinga oskepi nga komukuro wokuvare imbo.
Nungwari owo tji va vaza popezu nomukuro oskepi ye riveta motjitundu tjeheke nai kakatere. Okuzambo ozongazona za uta okuinyanyaura, noskepi ai utu okuteka moutupa. Omuhongore wovita arire tja tja: ‘Amuhe mbu mu tjiwa okutjaara rurumineye momeva nu mu tjaare nga komukuro. Eṋe mbo varwe ve kongorereye, nu tooreye ovitekero vyoskepi arire ku mwe ri ṱizire.’ Nowo va tjita nao. Momuano mbwi ovandu avehe 276 mba ri moskepi va vaza nawa komukuro nokuhinotjipo, otja omuengeli pa kwizika.
Ekoverwahi ndo ri isanewa Malta. Ovandu va ri ovanahange tjinene, nu va vatera ovandu imba mba za moskepi. Indu otjivepo tji tja wa pehi, Paulus wa tuwa moskepi yarwe na twarewa koRoma.
