KITAEM! dakesen ti barangay! Makitam kadi dagiti tattao a timpuak iti danum? Dadduma sumangsangladdan iti daga. Adda kadi ni Pablo sadiay? Kitaentayo ti mapaspasamaken kenkuana.

Laglagipem, a ti dua tawen naibalud ni Pablo. Sa isu ken dadduma a balud naikabilda iti barangay, ket mapanda idiay Roma. Idi lumabasda idiay asideg ti puro ti Creta, dinalapus ida ti napigsa a bagyo. Nagpigsa ti angin a di maiturong dagiti tattao ti barangay. Kalpasan adu nga al-aldaw, napukawen dagidiay nakalugan ti namnamada a maisalakan pay.

Gapu itoy kuna ni Pablo kadakuada: ‘Awan uray maysa kadakayo ti matay; ti laeng barangay ti madadael. Idi rabii nagparang ti anghel ti Dios kaniak ket kunana: “Dika agbuteng, Pablo! Masapul nga agtakderka iti imatang ti agturay a Romano, a ni Cesar. Ket ispalen ti Dios amin a nakipaglayag a kakaduam.” ’

Iti tengngat’ rabii iti maika-14 nga aldaw kalpasan panangrugi ti bagyo, nadlaw dagiti marinero a ti danum umabababawen! Intinnagda ti sinepeteda, tapno saanda a maidungpar kadagiti bato iti sipnget. Kabigatanna, nakitadan ti igid, ket naikeddengda nga iturong ti barangay idiay. Ket ti barangay naisadsad idiay ket saanen a makagaraw. Ti dalluyon ti umablat a mangrumek iti dayta. Ti kapitan ti buyot imbilinna kadagidiay makalangoy a tumpuakdan ket aglangoydan. Naibaga kadagiti dadduma a mangalada ti pagpatawanda manipud iti barangay. Iti daytoy, amin a 276 a tattao a nakalugan nakagtengda a sitatalged iti igid, kas inkari ti anghel.

Ti isla ti maaw-awagan Melita. Naasi dagiti tattao, ket tinulonganda dagiti naggapu iti barangay. Idi simmayaat ti tiempo, naipan ni Pablo idiay Roma iti sabali a barangay.