AKIMONA bwato buji mu lukatazho! Bubena konaika! Nanchi wibamona bantu baji pa mema nyi? Bamo bafika ne kala ku kitulu. Awe kampe Paulo, ke ibyo? Twaya tumone kibena kumumwekela.

Vuluka kuba’mba, Paulo wajinga kaili pa myaka ibiji ku Kesalea. Kepo aye ne bakaili bakwabo bebabikile mu bwato ke baye ku Loma. Byo bapichile pa jikuji ja Keleta, kwaishile mwela washinta bingi. Wapupilenga kya kuba bantu bakankelwe kwalulula bwato. Kabiji bakankelwe kumona juba kimye kya mute nangwa tubangabanga kimye kya bufuku. Kyapeleleko, pa kupitapo moba avula, aba bonse bajinga mu bwato balangulukiletu amba kyapwa twafwa.

Kepo Paulo aimene ne kwamba’mba: ‘Kechi mukafwe nangwa umo ne, poso bwato bonka. Mambo bufuku bwa lelo kwajikuñimena malaika wa Lesa. Aye wajikuñambila’mba, Paulo, kuchina ne; kyafwainwa obewa kukemana ku meso a Kesala. Kabiji tala, Lesa ukazhikijila bonse bo uji nabo mu bwato.’

Byo kyafikile pakachi ka bufuku pa juba ja bu 14 kufuma patendekejile mwela, aba bajinga mu bwato bamwene kuba’mba ko bayilenga kwatendekele kuseluka. Na mambo a moyo wa kuchina kwipunka ku mabwe kimye kya bufuku, baikizhizhe bimiko bya bwato. Byo bwakile lukelo bamwene kiito. Baesekele kutwala bwato ku kitulu kyaselebele.

Byo bafikile kwipi na kitulu, bwato bwakinkile panshi bwakosela ne ponka. Manyaki atendekele kwimaka ku bwato, kabiji bwato bwatendekele kulalaika. Mukulumpe wa bashilikale waambile’mba: ‘Anweba bonse mwayuka kowa mwikale batanshi kwiela pa mema ne kuya ku mutunta. Kabiji anweba mwashalapo mukwate ku bisapi bya ku bwato.’ Kabiji byo byo baubile. Mu jino jishinda bantu bonse 276 bajinga mu bwato bafikiletu bulongo ku kitulu, monka mwaambijile malaika.

Aja jikuji jatelwanga’mba Melita. Bantu ba ku joja jikuji bajinga bingi bulongo, kabiji balamine bingi bulongo boba bafumine mu bwato. Mwela byo ashikamine, Paulo bamubikile mu bwato bungi ne kumutwala ku Loma.