Wato Naufwa haLitungu
Chihande 112
Wato Naufwa haLitungu
TALA! wato uli muukalu! Uli nakupazuka muvihanda! Unavamono vatu vanalihumu hameya? Vamwe vanahete lyehi kutunda. Uze ikiye Paulu tahi? Tuwanenu vinamusolokela.
Nawanuka, Paulu vamukasanga myaka yivali muKesaliya. Jino ikiye navafunge vakwavo vanavahake muwato, vavatwale kuLoma. Hakupalika kwakamwihi nalitungu lyaKelete, peho yayinene hinayivawana. Malunga kuvuwa jino mbaku mwomwo yapeho yayinene. Numba kwachele oloze likumbi kulimona chiku, kaha naufuku nawa vatanganyika pimbi. Kutwala muze, omu hanahichi makumbi amavulu, vali muwato vosena kavafwelele cheka ngwavo navayoyako.
Jino Paulu mwemana nakwamba ngwenyi: ‘Muli enu kamweshi mutu umwe mwafwako; shina wato kaha. Mwomwo ufuku kangelo kaKalunga ezanga nakungulweza ngwenyi, Ove Paulu kanda wivwa womako! Chatela kuli ove kwimana kumeso aKesale, mwangana waLoma. Kaha Kalunga mwayovola vosena unakutambuka navo.’
Kafwe mukachi kaufuku halikumbi lya 14 kufuma hakuputuka chapeho yayinene, vaka-kutambukisa wato hinavamona ngwavo heshi yameya hanakuya nakwihiha! Hakwivwa woma naufuku ngwavo navaliveta mumalolwa, hikuzezumuna vikungo vyakwimikisa wato. Lichako hinavamona chihukulu. Hinavalivwasana vayenga nakusulika wato muchau kana.
Hakuheta kukamwihi nakutunda, wato hinauliveta mumavu nakukakachila. Jino hinauputuka kupazuka hakutenuka chamakanya. Kapitau kamaswalale ngwenyi: ‘Veshovo vanahase kuhala valivange kulimbila hameya nakuya kutunda. Enu vakwavo muvakave, nakukwachilila kuvihanda vyawato.’ Munavalinga vene ngocho. Shikaho vosena 276 vapwile muwato vayovokele kutunda, ngana mwashikile kangelo.
Litungu kana likiko Melita. Vatu vali nalikoji, kaha vanakukafwa vaze vanakufuma muwato. Omu yinatulisa peho, Paulu hikumuhaka muwato weka nakumutwala kuLoma.