Kî Kum Ra Swak Taki Bangwan
Sturka 112
Kî Kum Ra Swak Taki Bangwan
KAIKI KAIS duri tara rungwi ba! Pis ra baiwi tiwisa! Upla nani liura dimi yawi bangwi ba kaikisma ki? Kum kum pat auhya ra ulan. Pâl ba, baha tilara sa ki? Kaisa witin ra dia takan sapa kaikaia.
Sesaria ra mani wal baku Pâl ra silak ra mangki bri kan ba amya tikpara. Baha ningkara witin bara silak uplika wala nani aikuki duri tara kum ra mangki Rom ra blikan. Bara witin nani Krit kîka lama bak luya kan pyua ra, pasa saura tara kum mita duri ra prukan. Uba pasa karna kraui kan ba mita, duri tara ba sip pain wakras kan. Bara baha taka mita, witin nani yu bara slilma sin sip kaiki bangwras kan. Bara pyu ailal luan ningkara, witin nani swakwi takaia lukanka bri kan ba sut lus tiwi bangwan.
Bara Pâl bui naku aisan: ‘Man nani kumi sin prui bangwma apia; sakuna duri tara na baman lus tiwbia, kan Gâd insalka kum tihmia yang ra bal naku ai win: “Sibripara Pâl! Kan man Rom kingka tara mawanra buaisma, bara man tamka Gâd bui naha uplika nani duri ra na, sut ra prura wina swaki sakbia.”’
Yu 14 tihmia 12 aklak baku, pasa saura krauan ba wina, duri tara ra wark taki nani ba, ai tanka brih bangwan li ba uba tihu apia kan ba! Bara witin nani tihmia ra walpa kum wal prukbia sia, grapin lulki bangwan. Yu wala ra, witin nani kabu bila dimanka kum kaikan bara trai kaiki bangwan duri tara ba bakku brisi auhya un ra wih bangwaia.
Sakuna witin nani auhya un lamara wan pyua ra, duri tara ba auhya lawan kum ra kakahwan. Bara rip nani mita duri tara ba ra karna pruki, pis ra baiki tikan. Bara suldiar kum ra witin nani pura kaikaia mangkan kan ba bila: ‘Ya yawi bangwaia sip ba auhya un ra yawi bangws; sakuna yawaia sip apia nani ba liura dimi, duri piska nani ba brih awi bangws.’ Bara witin nani ba baku dauki bangwan, duri tara bilara upla nani 276 kan ba sut auhya un ra wih bangwan, insal win kan ba baku.
Kîka ba nina Melita maki kan. Bara uplika nani ba uba pain bangwi kan, baha mita witin nani duri tara wina bal ulan uplika nani ra uba pain muni bangwan. Bara laman taim Pâl ra duri tara wala kum ra mangki Rom ra blikan.
