NEA! ɛlɛne ne ɛbɔ! Yebubu bɔkɔɔ! Ɛnwu menli ne mɔɔ ɛwulu ɛgua nzule ne anu la? Bie mɔ ɛra file zo dɛbadɛba. Asoo Pɔɔlo agyi ɛkɛ ne la? Maa yɛnlea mɔɔ ɛdo ye la.

Kakye kɛ, bɛdole Pɔɔlo efiade wɔ Sizalia ɛvolɛ nwiɔ. Akee bɛvale ɔdaye nee pilizama bie mɔ bɛvole ɛlɛne nu, na bɛbɔle ɔ bo kɛ bɛkɔ Wulomu. Mɔɔ bɛdɛlale Kiliti bɔra ne la, ahumu kpole bie bɔle bɛ. Anwoma ne bɔle ɛsesebɛ mɔɔ ɛnee menli ne ɛngola ɛnga ɛlɛne ne a. Na ɛnee bɛngola bɛnnwu sɛnzɛne ne wɔ alehyenlɛ nu anzɛɛ nwɔlɔra ne mɔ wɔ nɔɔzo. Awieleɛ kolaa, mɔɔ kenle dɔɔnwo pɛle nu la, bɛdabɛ mɔɔ bɛwɔ nuhua la anwo vɔle bɔkɔɔ kɛ yeannyia yɛanyɛ boɛ, bɛbawu.

Akee Pɔɔlo dwazole gyinlanle na ɔzele kɛ: ‘Awie biala ɛnrɛminli ye ngoane; ɛlɛne ye ala a bazɛkye a. Nɔe, Nyamenle anwumabɔvolɛ rale me nwo ɛke na ɔzele me kɛ, “Pɔɔlo, mmasulo! Ɔwɔ kɛ ɛgyinla Wulomu tumivolɛ Siza anyunlu. Ɔlua zo Nyamenle ɛva bɛdabɛ mɔɔ bɛ nee wɔ lua nyevile ye anye la amuala ngoane ɛhyɛ wɔ.”’

Kɛyɛ alevinli mu nwiɔ avinli wɔ kenle 14 ne anzi mɔɔ ahumu ne bɔle ɔ bo kɛ ɔtu la azo, gyimayɛvoma mɔɔ wɔ ɛlɛne ne anu la nwunle kɛ bɛlɛbikye ɛleka mɔɔ ɛnle kuma la! Kɛmɔ bɛzulole kɛ bɛkɛhɔfofo awolɛ zo wɔ awozinli ne anu la ati, bɛdwulale bɛ sɛkɛ ne mɔ azule nu. Aleɛ hyenle la bɛnwunle ɛnwea. Bɛyɛle kɛ bɛbɔ mɔdenle bɛahɔnwe ɛlɛne ne wɔ ɛkɛ.

Mɔɔ bɛbikyele ɛnwea ne anloa la, ɛlɛne ne ati hɔminli ɛnwea nu mɔɔ bɛtu ɔ bo a ɔndu fee a. Akee azɛlɛkye ne bɔle ɔ bo kɛ ɔbu yeazi ɔ bo ne, na ɛlɛne ne bɔle ɔ bo kɛ ɔbubu. Sogya kpanyinli ne zele kɛ: ‘Bɛdabɛ mɔɔ bɛze weɛ la ɛweɛ ɛhɔ file zo. Bɛdabɛ mɔɔ bɛha la, bɛsesa ndaboa ne mɔɔ ɛlɛtudu ahɔ la bie na bɛli bɛ nzi.’ Na mɔɔ bɛyɛle la ɛne. Wɔ zɛhae adenle ye azo menli 276 ne amuala mɔɔ wɔ ɛlɛne ne anu la dwule aze mɔɔ bɛ nwo ambu ɛbonle, kɛmɔ anwumabɔvolɛ ne vale bɔle bɛ ɛwɔkɛ la.

Bɛfɛlɛ bɔra ne Mɔleta. Menli ne lɛ ahunlunyele kpole, na bɛyɛle menli mɔɔ vi ɛlɛne ne anu dwule aze la boɛ. Mɔɔ maanle nu yɛle kpalɛ la, bɛvale Pɔɔlo bɛvole ɛlɛne gyɛne nu na bɛ nee ye hɔle Wulomu.