¡CHAWILAMPEʼ, ri jukubʼ tijan kunim ribʼ pa ri jaʼ! ¡Tijan kutukinik! ¿La xawil ri winaq che xetzaq bʼi pa jaʼ? Nikʼaj chike tijan keʼopan chuchiʼ jaʼ. ¿La kʼo Pablo chilaʼ? Chqilaʼ su tijan kuriqo.

Masach pa ajolom, che ri Pablo ukʼamom bʼi kebʼ junabʼ tzʼapal pa Cesarea. Tekʼuriʼ xkeya bʼi Pablo xuqujeʼ nikʼaj chik e tzʼapalik pa jun jukubʼ rech kebʼe Roma. Che unaqaj jun chʼaqap ulew kʼo pa ri jaʼ rech Creta, xpe jun nimalaj jabʼ rukʼ kaqiqʼ chikij. Ri täq achijabʼ kekun ta chik xkebʼan ubʼe ri jukubʼ. Xuqujeʼ xekun täj xkil ri Qʼij pa jun qʼij xuqujeʼ xkil ta ri täq chʼumil chaqʼabʼ. Kʼisbʼal re, chiʼ qʼaxnäq chi kʼi täq qʼij, ri täq achijabʼ e kʼo pa ri jukubʼ xkechomaj che kekʼaseʼ täj.

Rumal laʼ Pablo xwalajik xubʼij wariʼ: ‹Nijun chiwe kkamik; xaq xiw ri jukubʼ ksach uwäch. Rumal che chaqʼabʼ jun ángel rech ri Ajawaxel xpe che ubʼixik chwe wariʼ: ¡Maxibʼij awibʼ, Pablo! Rajawaxik che katopan chuwäch ri César ri ajqʼatbʼaltzij romano. Ri Ajawaxel keʼukʼol konojel ri achijabʼ e bʼenäq awukʼ›, xchaʼ chwe.

¡Pa nikʼaj chaqʼabʼ rech ri qʼij 14 chiʼ xok ri nimalaj jabʼ rukʼ kaqiqʼ, ri täq achijabʼ xkilo che ri jaʼ nim ta upam! Xkexibʼij kibʼ che kkepotzʼij kibʼ che ri täq abʼaj pa ri qʼequʼm, xkekʼaq bʼi ri nimaʼq täq chʼichʼ pa ri jaʼ. Che ukabʼ qʼij xkil jun uchiʼ jaʼ. Xketzukuj ubʼe ri jukubʼ rech kopan chilaʼ.

Chiʼ e kʼo chi naqaj che ri uchiʼ jaʼ, ri jukubʼ xupotzʼij ribʼ che jumulaj sanyibʼ tekʼuriʼ xtakʼi kanoq. Ri jaʼ xumaj urepqʼanik che utukixik ri jukubʼ, rukʼ wariʼ xubʼan täq chʼaqataʼq. Jun ajchajanel, xubʼij: ‹Konojel ri kekunik kemuxunik, chebʼe che uchiʼ ri jaʼ; ri nikʼaj chik chikʼaqa bʼi iwibʼ puwiʼ täq chʼaqataʼq rech ri jukubʼ rech kixok ta bʼi pa ri jaʼ›. Are laʼ xkebʼano, rukʼ waʼ ri 276 täq winaq e kʼo pa ri jukubʼ e kʼaslik xeʼopan che uchiʼ jaʼ, xbʼan junam che xubʼij ri ángel.

Ri chʼaqap ulew kʼo pa ri jaʼ ubʼiʼ Malta. Ri winaq chilaʼ sibʼalaj e utz täq winaq, xketoʼ ri achijabʼ xeʼopanik. Chiʼ utz chi ri qʼij, xyaʼ bʼi ri Pablo pa jun chik jukubʼ tekʼuriʼ xkʼam bʼi Roma.