¡QAWAY, buqueqa yaku ukuta chinkaykuchkan! ¡Pakikuchkan! ¿Rikuchkankichu buquemanta yakuman pawaykamuqkunata? Wakinninkuqa qochapa patanmanmi chayaykuchkankuña. ¿Chaypichu Pabloqa kachkan? Qawasunchikyá imakunataq paytaqa pasarqa.

Yuyariy, Pablotaqa iskay watam Cesarea llaqtapi presocharurqaku. Chaymanta Pablotaqa presokunawan Roma llaqtaman riq buqueman seqarachirqaku. Creta islapa waqtallanta richkaptinku sinchi wayra-para hapirurqa. Runakunapas manam atirqakuchu buque manejayta. Intitapas chaynataq lucerokunatapas manam rikuyta atirqakuchu. Chaymanta achka punchaw qepataña runakunaqa manañam librakuytaqa piensarqakuchu.

Hinaptinmi sayaykuspan Pablo nirqa: ‘Manam hukllapas wañunkichikchu, buquem ichaqa pakipakurunqa. Chisi tutam rikuriykuwarqa Diospa angelnin, hinaspa niwarqa: “Ama manchakuychu Pablo chayankipunim Rey Cesarpa ñawpaqninman, lliw qanwan riqkunata Dios salvanqa”’ nispa.

¡Wayra-parapi 14 punchawña kaspankum buquepi llamkaqkunaqa tutapi musyarurqaku yakupa hondo kayninqa manaña llumpay kasqanta! Chaymi raqchi rumikunaman tutapi chocaruyta manchakuspanku buquepa llasaq watasqa fierronkunata wischurqaku. Achikyaramuptintaqmi rikururqaku qocha hina yaykuqpa patanpi aqollaña pampata. Hinaspanmi chayman buquetaqa chayachinankupaq afanakurqaku.

Hinaptinmi, qochapa patanman richkaptinku buqueqa umanpa aqopi plantakururqa manaña kuyurinanpaq. Hinaspanmi lamar qocha nisyullataña laqyamuptin buqueqa chitqakuyta qallaykurqa. Soldadokunapa capitanninñataq nirqa: ‘Nadeay yachaqkuna yakuman pawaykuspa nadeaychik patanman chayanaykichikkama, wakinnikichikñataq buquepa imankunapipas hapipakuspa lloqsiychik’ nispa. Chaynata ruraptinku, buquepi 276 kaq runakuna angelpa nisqanman hina islapa patanman allinlla chayarurqaku.

Chay islapa sutinqa Malta islam. Chaypi runakunaqa qoykukuqllañam karqaku hinaspam buquemanta lloqsimuq runakunata yanaparqaku. Para tiempo pasaruptinmi, Pablotaqa huk buqueman seqarachispanku Roma llaqtaman pusarurqaku.