HAREE bá! Ró hetan problema! Ró neʼe nakfera daudauk! Ó haree ema iha tasi laran ka lae? Ema balu toʼo tiha ba tasi-ibun. Paulo iha neʼe ka lae? Mai ita haree saida mak akontese ba nia.

Hanoin-hetan, durante tinan rua nia laran Paulo hela iha komarka iha Sezareia. Depois neʼe, nia hamutuk ema dadur sira seluk saʼe ró atu bá Roma. Kuandu sira liu besik rai oan naran Kreta, anin-fuik ida ataka sira. Anin huu makaʼas demais no ema la bele kontrola ró. Sira la bele haree loro-matan iha loron no mós fitun iha kalan. Liutiha loron barak, sira neʼebé iha ró laran lakon tiha ona esperansa atu moris.

Hafoin, Paulo hamriik no hatete: ‘Ema ida sei la lakon ninia moris; ró deʼit mak sei lakon. Tanba hodikalan, Maromak nia anju ida mosu mai haʼu no dehan, “Keta taʼuk, Paulo! Ó tenke hamriik iha Sezar, ukun-naʼin iha Roma, nia oin. Maromak sei salva ema hotu neʼebé hamutuk ho ó iha ró laran.”’

Liutiha loron 14 husi tempu neʼebé anin-fuik hahú, iha kalan-boot, ró-naʼin sira haree katak tasi la naruk ona! Tanba taʼuk katak ró okos sei kona fatuk ruma iha nakukun laran, sira hatún ankor. Dadeer-saan tuirmai, sira haree rai-maran ida. Sira deside atu koko lori ró no hakbesik ba tasi-ibun iha neʼebá.

Entaun, kuandu hakbesik daudauk ba rai, ró xoke rai-henek iha tasi laran no metin tiha. Laloran tasi baku makaʼas, no ró hahú nakfera. Komandante ida neʼebé hein ema dadur sira hatete: ‘Imi hotu neʼebé hatene nani, haksoit uluk bá iha tasi laran, no nani ba rai-maran. Tuirmai, seluseluk mós haksoit bá no kaer ai-kabelak ruma husi ró rahun.’ Sira halo tuir. Hanesan neʼe mak sira naʼin-276 hotu neʼebé saʼe ró konsege toʼo ba rai-maran ho diʼak, hanesan anju hatete nanis ona.

Rai oan neʼe naran Malta. Ema iha neʼe laran-diʼak tebes, hodi simu no tau matan ba ema husi ró neʼe. Tempu hakmatek tiha, ema hatama Paulo ba ró seluk no lori ba Roma. Dezeñu iha pájina tomak