AWONA boti lo lasweke m’nyanja. Kumbi utiŵawona ŵanthu wo ŵe m’maji mo? Anyaki afika kali kumtunda. Kumbi wamuwona Paulo yo? Tiyi tiwoni vo vamuchitikiyanga.

Kumbuka kuti Paulo wanguja m’jeri vyaka viŵi ku Kaisarea. Pavuli paki, iyu ndi akayidi anyaki angukwera boti ndipu angwamba ulendu wakuluta ku Roma. Sonu achijumpha pafupi ndi chilumba cha Krete, kungwamba chimphepu chikulu chakofya. Chimphepu chingulutirizga mbwenu ndipu ŵanthu angutondeka kwendeska umampha boti. Ndipu ndi msana lumwi aliwonanga cha, kweniso usiku nyenyezi aziwonanga cha. Sonu pati pajumpha mazuŵa nganandi, ŵanthu wosi wo ŵenga mu boti angufipa mtima kuti apozomokengi cha.

Sonu Paulo wangusoka ndipu wangukamba kuti: ‘Palivi yo watayengi umoyu waki kweni boti pe ndilu liswekengi. Pakuti usiku, m’ngelu waku Chiuta wanguza ndipu wangundikambiya kuti: “Ungawopanga cha Paulo! Utenere kuchima pamasu paku Kaisare, fumu ya Roma. Ndipu Chiuta wapozomoskengi iwi limoza ndi wo wenawu.”’

Pazuŵa la nambala 14 nyengu ye pafupi kukwana 12 koloku usiku, kutuliya po chimphepu chingwambiya, akwendeska boti angwamba kuwona kuti ŵenga pafupi kufika kumtunda. Sonu chifukwa cha kuwopa kuti angachitchayiska boti mu mya ndi usiku, yiwu angwamba kusiska ndondowa. Ndipu kwati kwacha anguwona dowoku. Sonu yiwu anguŵanaŵana kuti ayesi kwendeska boti kuti akafiki padowoku.

Ŵe pafupi kufika kumtunda, boti linguphata m’chimbumila cha mchenga. Pavuli paki, mayiŵa ngangwamba kupuma boti ndipu lingwamba kusweka. Ndipu kapitawu wa asilikali wangukamba kuti: ‘Yosi yo waziŵa kusambira wadukiyi m’maji ndipu wasambiri kuchifika kumtunda. Imwi muleka kuziŵa kusambira namwi muduki ndipu muko vimathabwa vo vasweka ku boti ili.’ Ndipu ivi ndivu anguchita. Sonu ŵanthu wosi 276 wo ŵenga mu boti anguchifika umampha ku mtunda nge po mungelu wangulayizgiya.

Chilumba ichi chadanikanga kuti Malta. Ŵanthu a pachilumba ichi ŵenga amampha ukongwa ndipu yiwu anguphwere ŵanthu wo ŵenga mu boti. Sonu mphepu yati yagowoka, Paulo angumukweza mu boti linyaki ndipu anguluta nayu ku Roma.